原來工業股大股東賣舊股套現浪潮仍未完結，上個星期經紀陳先至話過萬順昌（1001）近排擺出嚟嘅陣勢似一副批股格，點知話口未完，大股東真係賣舊股套現。
今次萬順昌大股東以每股1.25元，配售3120萬股舊股，套現3900萬元。雖然31球貨好似唔係好多，但原來已佔萬順昌10%股本咁多。
經紀陳話，雖然早排唔少工業股被大股東減持之後，股價不但表現硬淨，而且部份重升到你唔信，好似裕元集團（551）、中意控股（1198）等都係其中表表者，但對萬順昌賣舊股後表現，就有所保留，對今日復牌股價嘅表現唔係咁樂觀。
小初問點解？經紀陳話，皆因搞手唔同。大股東減持而股價勁升者，通常都係歐資或美資大行做搞手，或者係搵到金手指之類嘅芬佬接貨。
經紀陳又話，今次負責萬順昌配售舊股的搞手，雖然係本地數一數二嘅華資行，但客戶似乎以散戶為主，兼夾以往冇批完股就即刻炒上嘅紀錄，所以今日唔敢太睇好。
慕容小初