以特首董建華為首嘅特區政府，不理五十萬人上街嘅人民力量，一意孤行要如期於本周三恢復惡法二、三讀，所謂「人蠢冇藥醫」，令人扼腕，但係聽完大律師公會前主席湯家驊一席話後，覺得世事總係有得有失。如果唔係老董咁差勁，咁有恃無恐，點會激發咁多人上街？點會催生出多顆政治新星，例如一班平時錫身嘅大律師！
正如張信剛送溫家寶之詩句「不拘一格降人才」，眼見群丑當道，八方問湯家驊，既然避唔開政治，會唔會下屆選立法會呢？
湯大狀一聽到八方咁問，第一時間笑說自己對政治有「特別厭惡感」，覺得政治好醜陋。佢重笑住話好佩服余若薇等的忍耐力同勇氣，「佢可以容忍咁多指鹿為馬、黑白不分嘅言論，重可以心平氣和去處理，我未必做得到。」
至於梁家傑，湯家驊就鼓勵佢去參選，雖然梁家傑重未決定是否去馬。至於特首人選，湯家驊覺得非余若薇莫屬，原因好簡單，余大狀男女選民都一樣受落，又比梁家傑有議會經驗。
呢位Kingmaker愈講愈高興，差啲唔記得要北大人最後拍板，「胡溫」話就話新人物新景象唧，但係有冇氣度畀港人選特首呀？
（圖）湯家驊：余若薇做特首就好咯！
傳真︰2623-9278
電郵︰