猶記得2年多前首部DigitalWallet抵港，的確係一個最平儲到最多數碼相嘅方法，不過𠵱家記憶體價格回落，重係齋放相又點得呀！剛殺抵本港嘅ARCHOSAV320，以現時最大嘅3.8"彩色顯示屏，拉闊大家視野，集對應多格式記憶卡功能於一身，玩埋電子相簿、MPEG-4流動影院錄播器、MP3音樂錄唱機，再以20GB硬碟做後盾，重點止儲相咁簡單呀！
記者：朱崇德 攝影：陳偉強、朱崇德
ImageGirl：Shyrell（SunSpot）
歐洲牌子ARCHOS一向出開DigitalWallet同硬碟型MP3Player，呢部AV320喺歐美推出冇耐，咁快就有貨殺抵香港！攞上手第一個感覺，真係好細好輕身（112×82×31mm，350g），手感同部iPAQ差唔多，最醒目係個3.8"彩色闊屏幕，解像度有成320×240（262,000色），用嚟預覽相片絕對一流！開着部機真係超靜，難以想像收藏了一個20GB硬碟，原來用嘅係FujitsuNotebook硬碟機，質素同表現都高一班。唔係你點敢將成個旅行啲相放晒落佢度？
20GB容量嘅AV320有幾激？差唔多可以儲到20,000張330萬像素嘅JPEG或BMP相片，就算去一個月歐洲旅行，相信都夠你儲起全程靚相，兼隨時用特大嘅3.8"顯示屏瀏覽！為對應不同數碼相機需要，插卡位用外置擴充式設計，暫時可對應最流行的CF、MS及MMC等，相信對應卡種會愈嚟愈多。機身內置睇相程式，功能直逼《ACDsee》，1、4、9張顯示、旋轉方向、詳細資料顯示全部齊備，連SlideShow都有，儼如一部流動幻燈片機！
跟機送數碼影像傳輸接頭，一駁上就能夠將視頻、音頻輸入影像及S-Video的影音訊息，直接壓縮成最新的MPEG-4影像，即係可以將所有DVD、VCD、甚至陳年VHS錄影帶變為MPEG-4影音檔案！小記在測試時發現，影像擷取質素相當高，在PAL最優化模式下，解析度有320×240，在3.8"細LCD下睇，質素直逼DVD，就算駁上普通電視，質素都相當唔錯。加上20GB硬碟做後盾，閒閒哋可以錄下40小時MPEG-4影像，差唔多等於40幾集嘅電視劇！機身有一個USB2.0，下載速度比Firewire更快，就算傳40集電視劇入電腦都唔怕啦！
MP3Player可以話係Bonus功能，玩埋即壓MP3，或者經記憶卡同電腦將音樂下載，中文名稱嘅音樂檔案，雖然播到，但會有爛字出現。個50Pin擴充插頭，更令AV320功能變得無限，ARCHOS在網上公布，短期內推出附件AVCam300，裝上主機就成為一部具有330萬像素，3倍另加10倍數碼變焦嘅數碼相機！鏡頭組並唔係一般貨色，用正老牌Ricoh鏡片組件，兼附閃光燈，重有攝錄功能，儲存格式係老本行MPEG-4（320×240），網上並未有正式價錢公布，有興趣可上佢官方網址睇睇。
官方網（
售賣點：
DCWorld
電話：27810513/28347929
地址：旺角星際城市2樓222號舖/灣仔電腦城259號舖