近期，各大車廠紛紛推出至頂級豪華轎車，以顯實力；惟能夠突顯車主尊貴身份嘅卻不多。然而，一直備受推崇嘅勞斯萊斯轎車，雖然經已推出全新一代Phantom車系，惟舊有PhantomⅥ至今仍令車迷難以忘記。而大家眼前呢部經歷六年半時間翻新嘅轎車，不僅操作如昔，設備講究又豪華，加上當年產量只不過374部，咁有份量同價值嘅古董轎車，自然要給有品味嘅用家欣賞啦！
記者、攝影：李勤
汽車售價：$3,000,000
車輛提供：嘉信汽車（28938286）
重新包裝嘅座艙，前後兩排揀選上等水牛皮以人手縫製，置身其中貼服舒適外，四周重有完塊桃木裝飾，加上高級AV系統連電視屏幕，又有可把酒言歡嘅小酒吧配搭，若然遇有需要闢作流動會議室的話，佢重有座艙之間嘅玻璃活門同窗簾作遮擋㗎！還有後排獨立冷氣送風同照明，享受至高至愜意。
經全面翻新後，引擎表現如昔，除咗夠氣夠力之餘，四輪懸掛更屬全新組合，吸震反應柔韌有力，兼且重有唔錯拐彎支持力㗎！難得部車重有出眾隔音能力，加上行車表現平穩暢順，就算長途行車都唔易疲倦呢！
呢部勞斯萊斯PhantomⅥ古典長陣豪華轎車，輪廓分明突出之餘，大量電鍍裝飾品，除咗令車子看來倍見有品味同尊貴感外，佢重有一份現今汽車難得嘅典雅氣派，烘托響有要求嘅用家身上，自然更顯出一份優越魅力。
大家眼前呢部PhantomⅥ古董豪華轎車，響1996年3月下半年，被運返英國重修，先交由A&SEngineering（RollsRoyce&BentleySpecialistinAltonEngland）翻新整個車架及底盤，耗時達兩年（25/3/1996至16/3/1998），再交由RJM（UK）Ltd.（RollsRoyceRestorationSpecialistsinBristolEngland），完成埋引擎、機械及車廂修復工序，需時長達四年半（16/3/1998至10/9/2002），合共耗資約港幣250萬，直至今年上半年，方從英國運抵香港，單係箇中嘅價值，又豈可以車價來衡量呢！
自1998年下半年，英國勞斯萊斯收歸寶馬旗下後，有關方面即埋首研製全新一代Phantom車系。直至2003年1月上旬，歷時近五年嘅全新Phantom，終於正式跟外界見面；糅合科技與工藝於一身嘅新款Phantom，內外均予人耳目一新之感，惟Phantom固有嗰份豪邁風姿，卻不比當年遜色。
呢部咁古典嘅PhantomⅥ，可算係舊有英國勞斯萊斯一眾車款當中，至有份量、又凝聚有醉人魅力嘅豪華長陣轎車；整個PhantomⅥ生產歷程，由1968年直至1991年間，由於全車經由人手打造及裝嵌，故此響23年歲月中，廠方僅生產咗374部。而當年勞斯萊斯車廠，對旗下車款一直保持神秘感，汽車規格從來未有詳細公布，而外間僅知道PhantomⅥ所用嘅引擎，係發展自同廠SilverShadow；及至1979年後，車廠替PhantomⅥ換上沿用於SilverSpirit嘅一台6750ccV8偈，性能演繹有改善之餘，後期嘅PhantomⅥ更由原來3前速自動波箱，改換上4前速自動波箱㗎！