睇《TheMatrix2》見到三星部P408個型爆廣告，恨到流晒口水，點知直到早個星期套戲都就嚟落畫，部機先姍姍來遲有貨落場，由於貨源唔多，個價一炒就炒到上$7,500，依然有人要，近年都相當少見。不過今個星期水貨同行貨都返晒貨，供應相當充足，所以價錢就落到合理水平，冇之前炒到咁離譜，隔咗一個禮拜，相對於高峯期就跌咗成二千幾蚊，𠵱家水貨同行貨價錢都維持$4,600-$4,900，叫做合理好多。想玩擰擰Display、影相、65,000彩芒、40和弦手機嘅用家，如果之前唔捨得買，𠵱家係時候郁手啦。
近呢幾個月，影相手機市場一個月出幾部新機，逐漸形成大熱潮流，羅新基身邊個個朋友都話要玩影相，而且最鍾意就係追新機，一有新機出就將舊機Trade-In，所以手機舖通常都會做埋Trade-In服務。呢排又有唔少新機出場，幾個月貨仔嘅「舊機」就淪為二手機，手機舖老闆話最近最多人拎嚟放嘅機就係Nokia7250（3月出嘅機），其次就係SonyEricssonT610（5月尾出街！），通常放7250嘅就係Trade-In多，而放T610嘅就反而只係齋賣機，情況都幾得意。
文：羅新基