上月底馮仁昭聽港台節目《男人之家》最後一集嘅時候，明明聽到助理廣播（電台）處長邵盧善開口挽留主持韋家晴（即係無綫助理總監陳志雲），而且重叫已經離職嘅陳海琪返番去港台同陳志雲一齊做節目，搞到馮仁昭以為韋家晴同陳海琪前晚會一齊開咪做節目，點知竟然換咗個王雅文頂替。
原來港台搵陳海琪同韋家晴做節目呢單嘢搞到一鑊泡，到最後竟然係冇人通知海琪佢哋到底點，搞到海琪佢哋唔湯唔水！最搞笑係有人擔心海琪行為飄忽，可能會同韋家晴衝入電台開咪，於是叫王雅文將前晚原本做直播嘅節目錄音，重搵埋謝霆鋒做訪問嘉賓，以為咁就唔驚有任何意外發生，無端端搵霆鋒嚟過橋。
鄭希怡（Yumiko）噚日出席喺維園舉行嘅太陽計劃時，將大會T恤改為露膊裝，佢話改衫係慣例，而且自己尊重場合先至咁改。Yumiko日前接受港台錄音訪問，提到近日傳媒不斷將佢同黃伊汶比較，佢覺得呢啲報道有好多都係惡意中傷佢哋，話大家之間嘅友誼唔會畀呢啲報道影響喎。
黃霑前晚擔任港台節目嘉賓，佢話唔會理啲人七月九號去邊，只要唔好做犯法嘅事就得啦。當記者想再追問霑叔有關政治嘅問題時，佢話：「蕭伯納話過世界上最污糟係女人嘅陰戶同政治，但係我覺得只要你屋企有番梘嘅，女人陰戶一啲都唔污糟，反而政治就不論用幾多洗潔精都洗唔到。」
羅傑承同前女友陳加玲發生錢債糾紛，作為羅傑承唱片公司旗下藝人嘅關心妍，前晚喺將軍澳電視廣播城出席《勁歌季選》時力撐老闆羅傑承，佢話：「我識咗老闆好多年，佢一向數目好清楚，佢絕對係好人一個，我會全力支持佢，依然信任佢。我哋噚晚重開party，佢心情好靚好開心。」
梁漢文份人有時都幾搞笑，佢前晚喺將軍澳電視廣播城出席《勁歌季選》攞獎，當然好開心，點知佢攞住個獎畀人影相時，突然發現個獎分開兩邊，佢就好愕然鬼咁大聲叫：「點解又係我個獎爛咗㗎？」佢助手就即刻解釋話個獎設計係用磁石黏實，可以隨時分開黏埋，唔係爛。梁炳好尷尬咁講話以前試過爛咗個獎，好唔開心。
無綫劇集《皆大歡喜》嘅演員噚日喺奧海城出席活動，重同觀眾玩遊戲。其中有個遊戲係要鬥快食嘢先至可以搶答，阮兆祥、顏國樑同兩個現場觀眾都搏命將啲食物塞落個嘴度，其他女演員就睇到笑騎騎！
