每個人想入藝能界嘅原因都唔同，有人覺得做大明星俾人前呼後擁好威，亦有人想搵快錢。我羅拉認為就算係後者亦無可厚非，而近排就有唔少新人直認自己屋企負債纍纍，賺到啲錢都要畀晒家人。
好似韓國第一新人RAIN咁，佢本來只係一個鍾意跳舞嘅
𡃁仔，但入行之後，佢最敬愛嘅媽咪死咗，臨死之前重叮囑RAIN要好好照顧家人。當時只得十九歲嘅RAIN要擔起成頭家，搏命跳舞接job，兩年後RAIN果然不負媽咪所望，橫掃晒所有新人獎，而最近佢終於買到第一棟樓畀佢嘅爸爸同妹妹住，我羅拉都忍唔住要讚佢一句乖仔！
講真RAIN個樣好普通，咁佢究竟有乜咁巴閉可以紅起來？原來係佢未大紅之前，曾經幫過朴志胤同李玟編舞，如果大家有睇過佢用成千幾萬港紙拍嘅MV《壞男人》，裏面RAIN自己編排嘅太極拳舞，同埋健碩嘅身材，都明白佢下過唔少苦功。而且我羅拉重八到RAIN下月會嚟香港，到時大家就可以睇吓佢嘅真功夫。