今年上半年住宅成交總值約五百七十億，勁跌三成六。就算以一個佣計，代理市場舊年收八億九，今年少咗三億生意，若果兩個佣就變成六億，認真唔少嘢。
美聯物業副董事總經理黃錦康就話，樓市個餅縮咗，即係代理行業要蝕錢啦！佢哋公司用緊一個「輸出虧損」策略，就係自己爭取生意，唔好蝕錢，然後將啲虧損推畀行家，等佢哋去承擔。
試問有邊間代理可以頂得順呢？唔使講遲早都有行家要摺埋，究竟係邊間，佢就冇點明。
中記就話，佢哋上半年都有錢賺，咁咪變成其餘嘅代理行要蝕呢條數。
黃錦康嘅理論你又點睇呢？
蘭西就提出另一個可能性，係代理人數減少，同個餅同步萎縮，所以就唔見有代理行因蝕大本而執笠。
長實趙國雄噚日陪同日本駐港首席領事佐渡島志郎，出席紅磡漁人碼頭商場嘅日本節開幕禮。鍾意扮嘢嘅老趙話，自己似日本殺手，蘭西見佢全程戴住副黑超企喺領事隔籬，就覺得佢似G4多啲嘞。
之後老趙應日本節七夕祭嘅主題，將願望紙條掛喺竹樹上，佢嘅願望係「民富國強」四個字，唔使五秒就寫完，夠晒言簡意賅，同時回應對23條立法嘅意見，認為政府同市民要多啲溝通，保持祥和關係，盡快達成共識，然後齊心合力搞好經濟。
發展商賣樓，多數會喺報紙賣廣告宣傳，但會用幾多錢，就唔係咁多人知。上海喺呢方面就有詳細嘅調查，金豐易居發表嘅02年上海房地產報告，就五份當地報章統計，總共有970個樓盤，賣咗7756次廣告，費用夾埋係4.66億（人民幣，下同）。
呢五份報紙係《解放日報》、《新民晚報》、《新聞報》、《申江服務導報》同香港都有得賣嘅《文匯報》。舊年佢哋嘅地產廣告收入，比01年多咗近兩倍六，認真肥仔。
用於廣告費最多嘅樓盤，係上海世茂集團嘅世茂湖濱花園，舊年賣咗77次廣告，用咗1141萬，第二位都係佢哋集團嘅世茂濱江花園，呢個港人都有啲印象嘅樓盤，賣廣告87次，數量係各盤之冠，用咗大約967萬。兩個樓盤，都係位於浦東新區。
香港喺「沙士」疫情放緩後連續推出優惠活動，刺激消費，反應都好熱烈。另一個疫症重災區嘅北京，就喺除名後，推出一系列振興經濟措施，規模重勁。
長實東方廣場商場「東方新天地」響應號召，今個月起舉辦「世界風情嘉年華」，為期一年，夠晒長。每個月以一個國家或地區做主題，除有民族特色歌曲同舞蹈外，當然唔少得抽獎啦，每月送出獎品超過一萬份，都算大手筆。頭炮以德國為主題嘅「萊茵浪漫之旅」。
噚日信和喺小西灣藍灣廣場搞咗場騷，請嚟年輕人偶像表演，信和物業管理部總經理陳欽玲笑容滿面，佢話自從SARS過後，集團旗下商場人流有顯著升幅，好似藍灣廣場就多咗接近五成人流，另一招牌商場屯門市廣場，假日人流更創出二十三萬嘅新紀錄。舊年信和用咗過八位數字嘅金額喺商場推廣方面，今年雖然有SARS問題，但宣傳開支應該同舊年差唔多，同時，自97年已經凍結嘅商場管理費，短期內唔會有變化。
近排23條立法搞到滿城風雨，陳欽玲就話，政治問題暫時未影響市民嘅消費意欲，佢哋嘅意願都係以社會穩定為要。
蘭西
電郵地址：
