陳家三姊弟，一個鍾意游水，一個想踩單車，一個又要跑步，短短一個月，陳太日日帶住三隻小魔怪通街走，足足瘦咗十磅！但近日，陳太好得閒，晏晝重可以去Shopping，原來三個仔女一齊參加了小鐵人訓練班，可以喺短短兩小時，就玩勻游水跑步踩單車，原本肥胖的小弟練到骨肉均稱，有型有款，玩咗一個月就可以參加比賽，成績也不錯！小朋友，如想有個健康體魄，只要滿六歲，都可以參加啦！
記者：梁佩芬
攝影：陳盛臣
小鐵人運動雖然流行多年，但小朋友都只知係游水、踩單車及跑步，但比賽賽程有多長呢？係唔係要游水好叻才可以玩？一大串疑問，由香港鐵人代表隊成員，小鐵人訓練班導師阿男解釋給你知！
問：小鐵人每次比賽要多久？
答：小鐵人比賽形式與大鐵人（成人）相近，都是先游水，後踩單車，再跑步，年紀太細，可參加二項鐵人比賽，如游水及跑步。而游水由100米至700米；踩單車1至10公里；跑步500米至1公里都有，每次比賽長短也不同，所以需要常練習，才能應付不同種類的比賽。
問：要一次練三個運動，每次要練習多久？
答：通常一星期二至四日，如果暑假就可練到五日，每次兩至三小時。平日練單車加游水、跑步加游水、或單車加游水，到星期六就一次練勻三樣。
問：使唔使自備單車、頭盔？
答：唔使。就算比賽，可向三項鐵人總會以便宜方式租單車。
問：咁要自備乜裝備？
答：泳衣或泳褲，短褲短袖衫及一對波鞋，還有毛巾及洗澡用品。
問：係唔係一定要識游水先可以參加訓練班？
答：不一定，我哋有游泳班，畀唔識游水嘅小朋友參加，還有單車班，教你踩單車。當然，你一早就識游水同踩單車，就可以即刻加入訓練，快啲去比賽。
明日大鐵人
小鐵人訓練班
練習時間：逢星期一、五8:00am-10:00am或4:00pm-6:00pm
地點：香港體育學院、城門谷泳池等全港多個地方。
學費：$300起
報名及查詢：力行三項鐵人
地址：沙田多石村五號一字樓
電話：94163147
網址：