林雅詩在二十歲那年開始拍三級片，走了五年三級路，其實也星途崎嶇，她說試過在拍脫戲前，導演提出清場，但拍時反而突然多了十幾對眼睛在盯着；拍前說好不露點，拍時又有人要她把衣裳拉高，見點才收貨。有時她好想哭，那一刻要同意抑或反抗，她一個人都不知如何是好。
有沒有拍過爛片？Grace說有，她這樣說：「因為為咗生活，拍之前啲人永遠講得好好聽，話唔會拍得cheap，拍嘅時候先知道同講嘅相差好遠。試過開戲之前佢哋話搵邊個男星做對手，到拍之前嗰晚就話畀我聽，阿邊個個期唔得，要轉人。好啦，拍嘅時候有人喺現場影劇照，啲相因為尺度問題，畀報館雜誌都唔出得，咁點解重要搵人影？啲相又唔知點解會外洩，喺網上流傳，自己個心真係好難受。
「我又試過着泳衣拍戲，嗰場戲唔使露，但拍時有人話要揭起件衫見點，要夾硬唧出嚟畀人睇，好多時我拍完都好驚，如果我出聲，啲人就會覺得我諸多要求，盞討人厭，我好唔想有呢啲事發生，但又冇計。」
當上脫星，Grace總會遇上戴上有色眼鏡去看她的人，她說：「我自己嘅朋友唔會睇小我，但有次有啲衰嘅朋友，打電話畀我男朋友，特登喺佢面前講我壞話，我男朋友打畀我講呢件事時，我啱啱拍緊戲，我聽完真係好down，影響做嘢嘅情緒。嗰啲人唔支持，都唔需要講啲說話咁難聽，我拍三級片，唔係偷唔係搶，唔使問人借問人賒，我自己使錢使得開心，鍾意買乜都得，咁又有乜問題呢？我成日都係咁樣安慰自己嘅。」
自從Grace公布婚訊後，不少片商都游說她拍最後一部脫片，但Grace揚言不會考慮了，她說：「我唔考慮啦，因為我要同男朋友交代，好大壓力㗎，重慘過交功課畀先生。你話朋友叫到，唔使脫幫下手拍戲就冇所謂，我覺得再脫都冇乜價值，啲人唔會當藝術片睇，淨係話有嘢睇，有衫剝喎，所以唔想再脫啦。」
林雅詩是九七年港姐落選佳麗，當年她參選時，正與一名圈外男友拍拖，由於港姐集訓行程緊密，保母對佳麗又看管嚴密，要會見男友，確實是件難事。
男友擔心她太累，精神不好，兩口子又不敢見面，於是男友託朋友把雞精悄悄偷運給她，讓她補補身，她將半打雞精捧在手裏時，開心得雙眼發亮，比贏冠軍還高興。那時，她才十九歲。
林雅詩是個戀愛大過天的人，管它選美有沒有名次，管別人怎看她這個脫星，能找個真心愛她的人才是福，即使要放棄一切，她也願意交換。
