前一排喺沙士陰影下，做飲食業嘅公司都幾慘，主要做即食產品生意嘅康師傅（322）喺兩個禮拜內股價就勁跌3成。當上個月喺老懵董冇再公開提及沙士之後（按：喺老懵董字典裏，唔再提就等如冇），班大戶原本諗住係時候再做大騷，喺上個月好努力咁將隻股踢番上最高1.57元後，點知屋漏兼逢連夜雨，日清話要入股康師傅嘅死對頭統一，結果班大戶冇郁到手，因為驚住班芬佬會大舉拋售康師傅，到時接到一手都係。
不過上個禮拜，隻股都冇點俾班芬佬拋售過，喺上星期尾段，班大戶又再喺度試盤，將隻股推番上個半水平，聽講今次班大戶指明要掃番高隻股票。
今年康師傅已經打開咗台灣業務，預期今年整體業務仍然會較預期為好，預計公布業績時會有大把資金搶貨。聽講班大戶乃「衝動派」掌門，話到明套戲一定要即日上映，目標直指1.8元。
上次因公布同Transmeta合作而衝上兩毫六嘅文化傳信（343），股價喺過去兩個星期企咗一輪後，上幾日又再郁番，據一位大行行家所講，佢地舊年同IBM公布共同開發嘅飛龍晶片終於開始大量生產，重會喺今個月17日聯同IBM舉行交易會，向各界解說新推出嘅飛龍晶片有乜咁巴閉。聽講好戲喺後頭，因為佢哋更會邀請唔同專家嚟做騷，到時甚至會提到文傳、意科（943）同Transmeta合作推出嘅MidoriLinux，加埋飛龍晶片一齊用底下有乜優勢。伏勝有位做IT嘅朋友講，國內𠵱家好興用Linux，一來價格唔貴，二來效率更好，話唔定佢哋真係有能力威脅微軟呢個軟件巨人。
伏勝