楊千嬅一般係娛樂版常客，今次搵千嬅又唔係講潮流談時裝，當然更加唔會講鄭中基。今次搵佢，當然就着佢出新碟，講歌手原應最重視嘅音樂，還要是重返生活反璞歸真的那種音樂，重扯埋樂壇兩組獨立樂壇新鮮人at17同假音人嘅陳浩鋒齊齊Jam！
記者：吳小明
攝影：陳盛臣（訪問）
場地提供：ElementsLightings+Furnishings
千嬅隻新碟名為《MakeUp》，卻是反諷地不是玩排場、玩裝扮，而是反璞歸真做番自己，雖然今次是跟唱片公司約滿前最後一張碟，合約動向未明，不少人都認為要鋪張搞大佢做得好好睇睇。「排場嘢大家要睇嘅之前都睇過唔少，好懷疑大家還有多少興趣再睇，不如放開呢類浮誇表面嘢，以自然既一面表現出來重好。」所以今次唱片包裝方面無豪裝、無靚衫、無名牌攝影師、Stylist助陣，連化妝Set頭都慳番，統統一手一腳自己包辦，連影相都玩Snapshot自己影埋，好似D.I.Y咁自己一個搞掂，都幾有滿足感，有無新鮮感呢就要等大家評分。
■雖然今勻唱片形象樣樣自己嚟，但全碟附送整整60頁寫真都算大手筆，先睇睇部份相片係咪真如千嬅所講咁自然先。
說不上是個唱作兼備的歌手，千嬅都知自己的本份是要唱好每一首歌，但係揀歌方面佢一直都參與不少意見，今次的音樂班底依然有蔡德才、林夕等一貫舊人，質素有保證；但是千嬅特意請來兩組樂壇新秀at17及假音人為她作曲，期望有火花之餘，亦希望他們能帶給歌曲有更生活化的感覺；千嬅不諱言像她活在水銀燈下經已數年的人，唔多唔少都有跟真實生活脫節的感覺，今次找新人合作，無非是想搵番啲新鮮感及真實感。
分別各寫一首歌畀千嬅唱的at17，Ellen寫的《龍爭虎鬥》經已派上台，大家可能喺收音機經已聽過，一首輕快得來有少少火爆感覺的歌，Ellen早已在千嬅指定要她們寫歌前經已作好，亦無想過會派給哪位歌手唱，不過Ellen覺得由千嬅來唱亦好合適，她們二人作和音部份時跟千嬅一起錄了九個鐘才完成，感覺千嬅工作好認真專業。至於二汶寫的一首《魂斷威尼斯》，二汶好有信心表示呢首歌可以將千嬅最甜美的聲線帶出，因為她作這首歌時經已有一個聲音的Reference，是刻意令到歌曲足以將歌者最靚聲的一面帶出來。
假音人的歌一向奇趣，主音兼包辦作詞的浩鋒話今次首《忌廉溝鮮奶》亦是得得意意結他Pop風格，這首歌是專誠為千嬅度身訂做的，印象中的千嬅是個好真兼夾主動的人，重視朋友，所以佢將一份重視友情的感覺寫入歌中，並放心交畀千嬅演繹。
千嬅一向童心爆燈，小王子係佢一貫心愛玩物，不過今次佢有新歡，至新玩意HarryPotterLego兩大副，買咗足足幾個月都唔捨得拆，今勻專登帶出來還在眾人面前即席砌番手，見佢都算快手，不用15分鐘就砌好HarryPotter內的火車站，不過火車就等佢自己喺屋企慢慢砌好了。千嬅話其實細細個都鍾意玩Lego，不過媽咪覺得貴唔會成日買畀佢玩，所以𠵱家大個咗有能力買咪變咗有份情意結囉。
Ellen跟二汶嘅至愛玩意都不離音樂，Ellen帶住心愛CD日日出街不離身，訪問當日帶嘅就有Verve嘅《Remixed》同Blondie嘅GreatistHits，見到後者估唔到Ellen音樂口味都幾八十年代喎。
儲咗Playmobil只有一年的浩鋒，呢度嘅陣容經已是個人收藏大晒冷，佢話最鍾意Playmobil造型趣緻，質地又好好，普通款式唔係特別版嘅價錢又平，一般細路仔都可以負擔得來，佢最鍾意着制服的款式，貪嗰份制服誘惑感覺喎。