自俄國富豪阿巴莫域治入主車路士後，話會攞一億至兩億鎊出嚟擴軍；但睇佢咁樣「耍」蘇拿，我求大俠真係好質疑佢講嘅說話會唔會兌現。
話說喺蘇拿離隊之後，阿巴莫域治就想簽番佢，重向佢提出年薪一百二十五萬鎊；但係，轉個頭喺第二日，阿巴莫域治竟然出得嗰一百萬鎊，比頭一次出價少咗成二十五萬鎊。老實講，如果阿巴莫域治係有誠意留蘇拿，第二次出價點會少過第一次呀，所以我求大俠真係好懷疑，阿巴莫域治係咪有心搞起車路士。
講開車路士，有傳佢哋想同曼聯爭朗拿甸奴，但經過我求大俠明查暗訪後，發現原來係朗拿甸奴個阿哥兼經理人阿斯斯自己放風，想炒起佢細佬嘅身價。睇怕曼聯如果唔出多過兩千萬鎊，都幾難將朗拿甸奴搶到手。
阿仙奴雖係大球會，但對老臣子就有點那個。好似喺今夏約滿嘅伯金，佢喺阿仙奴踢咗八年，幫球隊攞過兩次超聯同三次足總盃冠軍，但會方仍然冇畀份新合約佢，搞到好冇癮，考慮掛靴。我求大俠都知阿仙奴因起球場好手緊，不過人家重有戰力，咁樣做似乎太過不近人情。
係人都知車斗利係利華古遜嘅資產，但係德甲聯升班馬法蘭克福就博大霧，同呢位南韓世界盃國腳簽約三年。利華古遜知道之後，立即用佢哋嘅否決權阻止咗呢單交易，不過就同意將車斗利借畀法蘭克福兩年。講真呀，利華古遜現階段都用唔着車斗利，等佢出去吸收吓經驗咪重好！
重未有班落嘅前修咸頓同布力般球員戴維斯，𠵱家喺保頓試腳一周，希望可以換來一張合約。之但係，雖則保頓領隊艾拿迪斯鍾意簽啲自由身球員，但個個有番咁上下份量，所以佢都講明，簽戴維斯嘅機會唔大。戴維斯呢幾年喺超聯踢得咁差，叫艾拿迪斯點簽佢呀！
球員唞暑通常都休息，但上屆效力澎馬流浪嘅港大生馮嘉奇，趁有時間搵番多少外快。我求大俠收到風，呢位形象健康嘅甲組球員，剛接咗個日本冷氣廣告，噚朝上廣州開兩日工，佢話接呢個廣告只象徵收番啲車馬費，但橫掂有時間，搵啲錢幫補學費都好㗎。咁識諗真係抵讚！