電視台當紅小生成日借女藝員過橋，幾乎同任何女藝人合作，都會傳緋聞嘅佢，就借住緋聞嚟上位。所有同小生合作過嘅女藝人，初時都會同佢幾老友，因為佢好識𠱁人，但之後啲女星就會發現自己俾人利用，譬如約咗小生出街，唔知點解就會俾記者影到相，最後啲女藝人唔係同小生反面，就係疏遠佢。
咁多年嚟，受害嘅女星真係唔少，明眼人都知係小生造新聞，尤其當知道呢位小生嘅性取向，因為佢根本唔鍾意女人，呢樣嘢喺圈中係公開嘅秘密，不過大部份觀眾唔知情，所以俾佢呃咗。小生成日通過相熟嘅記者放料，傳緋聞、有是非咁咪成日可以見報囉！馮仁昭唔明點解有啲傳媒會甘願俾佢利用？
張惠妹噚日上咗台灣歌星費玉清主持嘅電視節目做嘉賓，佢話自己除咗要錄音會捱夜之外，平日都好早瞓，最遲去到半夜兩點就頂唔順要瞓覺。
阿妹重話佢最精神係晏晝三點至九點，有時九點幾就開始精神恍惚，嚴重時重會語無倫次，有冇咁誇張呀！
樂壇新人李逸朗（Don）噚日帶三件難忘物品去商台接受訪問，佢話：「我帶咗fans嘅禮物，JoeyTang（鄧建明）教我結他嘅嘢同埋一個劍擊用嘅面罩。」
阿Don最近拍劇，劇中佢同2R嘅Race有感情戲，阿Don話Race係佢鍾意嘅類型，眼大長髮，人見人愛。
陳任噚日出席喺尖沙嘴香港歷史博物館舉行嘅「香港廣播七十五年口述歷史座談會」，對於今個星期三（九號）有人喺立法會外集會，問到陳任點睇？佢話：「其實我一向都唔係好講政治，不過我都覺得今次政府做錯好多嘢，應該聽吓人哋嘅意見，順應民意。」
蕭正楠同薛家燕等噚日喺沙田出席活動。蕭正楠喺台上唱新歌時要睇貓紙，不過當佢知道俾記者發現時，即刻將貓紙收入褲袋。
而家燕姐講到有關今個禮拜三（九日）會有遊行人士喺立法會外集合，佢話：「其實董特首都作出讓步啦，不過我都好欣賞香港人嘅團結精神。」
早幾日馬景濤喺北京拍清裝戲《皇太子秘史》，馬景濤俾一隻大蜜蜂喺面度針咗一下，即刻腫咗一大嚿，馬景濤堅持繼續拍攝，導演惟有改鏡頭淨係拍佢冇俾蜜蜂咬嗰一邊，所以嗰場戲馬景濤全部係側面上鏡。馬景濤話以後對蜜蜂有心理恐懼㖭。
