溫總理來港，大受歡迎，臨走前講咗一句「我的三天任務完成了」，大堪玩味。國家領導人嘅演講、言詞唔可以睇表面，其實內裏玄機，艱深過格林斯潘演講。華盛頓有專家專門分析格林斯潘嘅說話含義，聽中國領導人講話，當然亦要請教專家。
報壇夫子話畀左丁山聽：「總理來港，當然係當作任務辦，照足劇本做事，惟有一樣，因為冇記者問起周正毅，所以總理唔講，香港記者走寶矣！」唉吔，早知就會問清楚啦。夫子話：「總理知道講沙士係主要任務之一，所以記熟晒啲數字，記住謝婉雯醫生個名，返到去就有其他任務，腦袋要裝載其他數據咯！」咁樣，點解曾鈺成貴為民建聯主席，冇功都有勞，總理竟然唔知佢做乜？
夫子話：「你有所不知，胡主席溫總理以前從未管過港澳事務，對香港甚為生疏，來港前即使惡補，都唔會記得晒。何況來港主要任務並不包括認識行政會議成員，腦袋嘅記憶體係用來做其他事情嘅，邊會記得曾鈺成、田北俊等係邊個打邊個？」
總理要記住國家大事，唔得閒理香港咁多嘅，北京觀察家話胡溫只求董特首生生性性，唔好搞亂香港就算，當然政治上絕不放鬆，務要通過23條，即使港人包圍立法會大樓，亦唔會退讓通過，之後就一定會不斷派經濟朱古力，大前提假設就係港人乃經濟動物，有朱古力糖食，就會忘記政治。