效力福建籃球隊的宗銘達一向百足咁多爪，平時鍾意儲波鞋，放假就會同朋友打wargame；唔使練波時，佢又會落球場同人踢吓波。今個禮拜，「達仔」到旺角一棟商業大廈玩遙控車Mini-Z，睇佢一袋二袋嘅裝備，再套用「周身刀、冇張利」嘅俗語，以為「達仔」都係「有姿勢、冇實際」之徒，點知見識過佢「手」車後……嘩！好犀利啊！ 文：李勇明 圖：黃冠華
已有三年玩Mini-Z經驗嘅「達仔」，最初接觸呢種同真車比例為一比二十八嘅遙控賽車，係透過朋友介紹。「真係會玩上癮㗎，我由之前一套車，到𠵱家有十幾架車，連改裝、場租等等，都唔記得用咗幾多錢係度。不過，呢啲係自己興趣嘛，點都好過其他不良嗜好呀！」達仔一邊聚精會神裝配零件、一邊回應說。
玩Mini-Z嘅入門好簡單，因為一套連車連遙控嘅Mini-Z，大約買六百幾蚊，不過，要好似「達仔」咁專業，就一定要透過改裝技術加強架車性能。
「其實玩Mini同真車都幾相似，成架車都可以改裝，由摩打、電腦板、車架、軚鈴、車胎、扭腰板、定風翼、避震，甚至乎遙控器都可upgrade，每次落場鬥車時都可以轉換setting，賽道彎多直路短，定係有高低跳台，會因應賽道再將架車調校，情況同真正鬥車好似，唔同嘅係玩Mini炒車唔會傷人，安全好多。」達仔說。
「Mini另一個好處就係可以換車殼，只要有一個車架，就可以換唔同嘅車款，乜嘢GTR、法拉利、掃把佬、BENZ跑車、保時捷都可以配合。除咗Mini外，鍾意越野車又可以換架Overland，鍾意速度更加可以學舒密加揸F1方程式都冇所謂。」
