喺23條立法問題上，批評葉劉淑儀最唔客氣嘅李國寶，噚日被召上京。八方同好多行家，都寄予好大期望，希望佢可以如實反映，大家唔想23條咁急亂立法嘅意見。於是大批行家就蜂擁北上，噚日大清早五點幾爬起身，搭最早班飛機上北京，喺機場搵定好位，靜候寶Baby到來。
望穿秋水，寶Baby終於喺下午四點半蒲頭，隔咗一陣，出機場同大家見面。但係商家始終係商家，佢似乎對政府修訂立法幾受落。當各個行家心急追訪寶Baby嘅時候，喺機場貴賓通道外面突然多咗幾個後生女仔，細細聲咁不停叫一個人名。當時，大家都冇為意，究竟發生乜嘢事。
直至八方返到酒店仔細睇相，哈，原來當Baby做緊訪問嘅時候，後面有一個戴住黑超黑帽，着住黑色外套，充滿星味嘅人出現。睇真啲，佢咪係郭富城！原來城城嘅fans咁斯文，真係抵讚。城城今晚會喺北京出席一個大型文藝晚會，向醫護界致敬。
（圖）李國寶喺北京俾大批傳媒追訪，佢身後嘅郭富城經過時，大家都唔多覺眼。 馬泉崇攝
傳真︰2623-9278
電郵︰