個唱訴哀情感激兩舊愛
陳慧嫻向男友示愛搵近萬觀眾作證

陳慧嫻前晚在紅館舉行個唱期間，面對三位新舊男友說出心底話，其中最讓人感動莫過於她對現任男友謝國麟醫生的愛的宣言，希望對方會珍惜自己，慧嫻還獻唱一曲《愛你》表達心聲，更叫現場近萬觀眾為她見證，場面溫馨感人。

陳慧嫻前晚於紅館舉行首場「陳慧嫻珍演唱會」，其現任男友謝國麟醫生到場打氣，初戀男友區丁玉免費任鼓手，前度男友MichaelCheung有指亦有捧場。
面對三位新舊男友，慧嫻在台上盡訴心中情兼發表愛的宣言，慧嫻說：「好多人關心我嘅感情生活，問我幾時結婚，我都唔知有冇結婚緣，結唔結婚唔緊要，最緊要係同心愛嘅人一齊，過去到現在我拍過三次拖，學咗好多嘢。」

「好似長短針」
慧嫻表示不懂珍惜與區丁玉的第一段感情，她說：「當時係我事業衝刺期，錯過一個好好嘅人。到第二段感情，學識珍惜身邊人，但適值對方事業衝刺，好似時鐘上長短針喺度追逐，最後我選擇放棄。
「我想同第一位男朋友講，多謝你咁愛護我，你永遠係我最好、最明白我嘅知己。第二位男朋友，我希望你搵到個鍾意嘅女仔，有需要時我會係你最好嘅聆聽者，雖然唔能夠一齊，但相遇已經好好。」說罷慧嫻獻唱一首《IWillAlwaysLoveYou》送給兩位前度男友。
慧嫻又對現任男友發表愛的宣言，她一臉嚴肅地說：「身為娛樂圈嘅女仔好難搵男友，處境係高不成低不就，當我搵到個鍾意佢、佢又鍾意我嘅人，就會諗佢係鍾意我本身，定係鍾意陳慧嫻。」

「望一齊老去」
轉頭慧嫻對男友謝國麟醫生說：「謝醫生，希望你真誠咁對我，希望你鍾意我而唔係鍾意陳慧嫻，喺我脆弱嘅時候，畀個膊頭我挨，喺我驚慌嘅時候，用你雙手包住我雙手，當我喊時你幫我抹眼淚，希望你永遠愛護、保護、珍惜同信任我，唔好好似個時鐘上面嘅長短針，辛苦咁追逐，我係公眾人物，希望唔會畀好大壓力你，希望我哋一齊老去。」說罷慧嫻便獻唱《愛你》，之後向觀眾說：「希望你哋幫我見證呢件事。」

「紅地氈盡頭」
完騷後謝國麟在紅館門外，被問到可有為慧嫻的愛的宣言而感動，他一臉尷尬說：「我搵唔到路走呀，我嚟睇騷咋。」
此外，慧嫻在台上提到其早前跳樓死去的愛貓，竟忍不住哭着說：「佢死咗後，我就開始事業唔順利，同唱片公司關係唔好，身體又唔好，好似紅地氈走到盡頭。」
採訪：王連連攝影：仇志德