如果我羅拉話飯島直子係索女，相信冇乜人反對，所以唔少男士都唔明，點解兩年前飯島嘅前夫、樂隊TUBE主音前田亘輝，會咁唔識貨同老婆離婚。最近我羅拉八到前田目前狂追富婆叶姊妹嘅妹妹美香，終於明白直子所以會離婚，原來因為三十四係細過三十九嘅。
大家唔好誤會，我唔係話直子今年三十九歲，老過美香五年所以俾老公飛，事實上，現年三十五歲嘅直子只係大過美香一年。我嘅意思係前田原來好沉迷女色，而且對「巨乳」二字執迷不悔，連有三十四吋胸嘅直子都滿足唔到佢，要越級挑戰三十九吋上圍嘅美香。
據報紙《東京Sports》報道，前田同直子重好恩愛時，就試過喺街度當住老婆面眼甘甘望啲巨乳少女，㷫到直子發火話：「你呀，就係鍾意巨乳！」再加上前田周圍滾等等嘅導火線，直子嬲到兩年冇同前田行周公之禮，最後重離埋婚㖭！
而前田最近終於有機會接觸佢嘅夢中巨乳女神叶姊妹，打golf相當掂嘅佢，知道叶姊妹都好此道之後，即刻搵中間人介紹，前幾日至夢想成真同姊妹花喺茨城切磋。前田睇中咗後生啲嘅美香，𠵱家日日向佳人大獻殷勤。
不過，直子似乎對前夫已經無晒感覺，前日出席捐血宣傳活動時，鬼咁風騷迫記者捐血。