近排興起本地遊熱潮，每逢有樹有草有山有水的地方，均人頭湧湧。好似長洲、南丫島咁，多人到真係怕佢會陸沉。唔想好似行花市咁迫，我諗都係要搞搞新意思，最近知道有樣新玩意，就係學漁夫坐艇仔出海網魚，連平日十指不掂陽春水嘅Erica，都唔怕濕水、唔怕魚腥味，邊起網邊叫爽！
記者：區佩嫦 攝影：楊錦文、陳偉強
Model：健、Erica（FromSunSpot）
黑沙灘摸大蜆
龍鼓灘的沙屬於黑沙，沙下面有好多大蜆，一家大細喺度游水外，重會喺度摸蜆。啲蜆藏喺沙下三四吋深，用人手或者玩具鏟都摸到，大約摸半個鐘都會有十幾隻的收穫，整炒蜆就最正。
龍鼓灘後的龍門徑，屬於郊遊小徑，由這小徑通往的山林被稱為蝴蝶林，通處都見到蝴蝶，有啲重係罕有品種，絕對難得一見。有見及此，燒烤場便請了位專家帶大家去睇蝴蝶，聽專家阿信講，本地最多蛺蝶和鳳蝶，呢兩種蝶都喺龍鼓灘可以搵到。
後部的藍色翅膀好搶鏡，邊沿布滿圓點，翠藍眼蛺蝶最鍾意曬太陽，所以在陽光普照的日子可見其影蹤。
呢隻淺啡色的紅鋸蛺蝶，其特點是翅膀成波浪形的裙邊，上面布滿黑、白的斑點及線紋，屬罕有蝴蝶之一。
網完魚差唔多成七點，不如行去燒烤場旁的小山上睇日落。橙紅色的太陽徐徐下降，咁靚嘅良辰美景，梗係談心浪漫吓啦！
劉伯有60年的捉魚經驗，佢話：「網魚有兩種方法，一是坐小艇駛出較淺的水域，將整個網拋落海，小艇在附近兜圈，將魚趕去魚網內。另一種係去較深水域，漁船邊駛邊拖着網行。」
「網魚重要留意潮汐，潮漲時特別多魚，好似呢幾日，朝早和傍晚的七點幾至九點係水漲時間，魚穫特別多。」
落網並非想像中簡單，要先將石頭綁着魚網下端的其中一角，然後將魚網慢慢拋入海中，拋網時，小艇要慢慢向前駛，個網就形成一道屏障，任何游過的魚都自動入網，大約5分鐘將網攞起就得。
有乜魚穫
三點黃魚
呢種三點黃魚一年四季都可以網到，屬於淺海魚類。魚身有三點，所以稱為三點黃魚，肉質幾甜，不過較為多骨。
烏頭
無諗過喺海度都可以網到烏頭，一般的烏頭屬淡水飼養，海烏較少。烏頭肉質較滑，營養豐富，此魚屬四季魚。
好唔好玩？
個個星期都入嚟龍鼓灘玩，不過今日先第一次網魚，覺得幾好玩吖！無諗過自己都可以網到魚，收穫唔錯，不過唔知啲魚好唔好食。
我第一次出海網魚，坐住快艇網魚感覺幾爽，網到魚又可以吹海風，幾舒服。網完魚先知原來咁淺水嘅地方（約3米水深）都有咁多魚。不過網魚好似無乜難度，我都係鍾意釣魚多啲。
芭堤雅燒烤樂園
地址：屯門龍鼓灘村136地段
電話：26138083
營業時間：2:00pm-12:00mn（星期一至五）、12:00noon-1:00am（星期六、日及假期）
收費：全日燒烤每位$60、網魚每位$30（4小時）、蝴蝶觀賞團每位$30。
備註：全部活動均須預約
交通：屯門市中心乘A52號巴士直到總站或在蝴蝶邨乘的士約$40；另有免費停車場。