五十萬港人上街，搞到我哋嗰位出名議而不決嘅特首董建華頭都大晒，咁大嘅政治危機佢老人家諗都未諗過，你叫佢點識處理，咪猛叫人畀多啲時間佢諗。
喂！你老哥就話係阿爺欽點，八百人小圈子產生，其他同你齊齊玩嘅政黨好似自由黨，始終都要睇啲選民嘅面色，除非下屆唔玩啫。田北俊見勢色唔對，時間亦無多，等得老董嚟人都死，所以索性直上天庭，搵港澳辦廖暉密斟，然後攞住張聖旨返港宣讀，實行先斬後奏。
田少呢一着肯定獲得不少港人掌聲，但係兵行險着，重要睇吓班民建聯、工聯會同土共如何反撲，老董肯唔肯順應民情，八方一位老友就最怕田少收錯風，令遊行人士空歡喜一場。
當然田少嘅方案未係最好，因為仍有時限，但總算可令大家鬆一口氣，避過咗7.9可能爆發一場衝突，你話如果中環出事，金融中心地位肯定動搖，到時真係不敢想像外資會如何看待香港。
事實董班子處理遊行太傲慢，7.1當日連前高官鄺其志都出現維園，不少高官亦微服出巡，有啲就坐喺架車入面，喺灣仔一帶兜圈以察民意。老董永遠係皇帝唔急太監急，一啲高官私下認為最上策係即時叫停，等大家消消氣再嚟過，但係老董一定唔會咁做，此乃其愚不可及之處也，結果咪係大鑊咯。
傳真︰2623-9278
電郵︰