今個夏天流行古銅膚色，靚女瘦骨仙都唔執輸，周不時走去沙灘曬太陽，本來好多藝人都唔鍾意喺香港嘅沙灘日光浴，怕咗狗仔隊嘛，但瘦骨仙就好少理，皆因佢喺外地都俾人影過火辣三點式相，冇乜必要再避。
馮仁昭今日講呢單料，唔係笑瘦骨仙曬太陽，而係笑佢竟然着泳衣都要搏命加胸墊，本來瘦骨仙身材唔差，弊在佢減肥減過籠，減到連個胸都冇埋，好多人都奇怪點解佢喺外地曬太陽嘅時候，身材忽然勁番，原來係因為佢加咗胸墊，一個嫌唔夠，重要加夠三個咁多，所以造成心口勁凸嘅效果。
而瘦骨仙喺返香港嗰陣，喺飛機度睇報紙，覺得啲相影得唔錯，上圍凸出好誘人，睇到佢鬼死咁開心，而佢又知道有記者喺機場等佢，於是就火速喺行李度搵番嗰三個胸墊，然後走入廁所塞入心口度，搞到行出機場嗰陣，成個波霸咁款，重一臉自信㖭！
鄭秀文（Sammi）噚日接受港台訪問，問到佢同古天樂嘅緋聞時，Sammi話：「冇回應！我未到爐火純青嘅地步，所以唔回應，費事講錯嘢！」跟住佢重話：「對於呢啲報道我唔係好嬲，我根本好遲先知件事。」最近有傳Sammi同梅艷芳去活動嗰陣，因梅艷芳遲到，搞到Sammi提早離場，噚日佢否認話：「吓？好彩我同佢熟，唔係就俾呢啲雜誌嚇親。我同佢呢幾日係冇見，不過約咗遲啲一齊去旅行，但未決定地方。」
琦琦噚日去咗台灣為代言嘅Contrex礦泉水出席宣傳活動，佢話啱啱喺泰國影完相，曬得一身古銅靚膚色，佢以國語笑住話：「我喜歡蜜糖色的皮膚，很健康啊！而且我是個很容易白回來的人，一到冬天，白膚色就回來了。」琦琦笑言自己唔鍾意做運動，又鍾意食朱克力、糖果、麻辣火鍋。琦琦話：「工作已經很累，想吃就吃囉！」
葉蒨文同霍啟剛，噚日喺清水灣鄉村俱樂部出席「保良局高球獻技惠社群」活動。葉蒨文見世姪霍啟剛被記者包圍，即上前為佢解圍，重同霍啟剛話：「唔好講咁多，媽咪唔鍾意㗎！」問葉蒨文佢老公林子祥近況？佢話：「好好多啦！阿Lam嘅朋友今日都有請佢嚟，但佢耳仔重未好番晒，所以我代佢出席。」
陳松伶為前晚一個香港回歸騷做表演嘉賓，原先佢見好耐冇唱《天涯歌女》呢隻歌，所以諗住揀《天涯歌女》同新歌《生命天使》嚟唱，但好衰唔衰《天涯歌女》啲歌詞好鬼慘情，根本唔啱前晚嘅場合，所以最終都係俾大會cut咗。而松松前晚遇上表演變臉嘅大師，佢話好有興趣想學喎。
