日本人好鍾意用二十歲呢個踏入成年嘅年齡做藉口，嚟解釋啲人點解突然會做埋一啲大膽嘅事。最明顯嘅例子莫過於藝能界一班女星，佢哋一到咗二十歲，一定會拍本勁量級性感寫真，今次嘅主角就輪到Morning娘嘅是非精矢口真里。
噚日矢口啱啱推出佢第二本個人寫真集《Love-Hello！矢口真里寫真集》，呢本嘢嘅相全部都係喺越南影㗎，去到咁遠無非係貪嗰度有陽光海灘之餘，又充滿自然氣息。其實矢口嘅身材只算中規中矩，但係突然破格着咗十幾套性感水着、bratop，真係令人眼前一亮，原來呢位是非精收起把口做索女，都幾風情萬種㗎。
我羅拉聽矢口講，今次佢為咗表現悠閒感性嘅一面，自動提議喺越南做景點，不過着咁少布對住咁多人搔首弄姿，始終有啲尷尬，所以拍嗰時特登將啲衫一層一層咁剝，即係先拍最密實嗰套，等佢熱咗身先至以三點式見人。
如果各位鍾意聽矢口吱吱喳喳嘅fans，亦唔使失望，矢口話好戲在後頭，事關十六號佢會推出DVD，到時重可以見到佢玩水上遊戲玩到喊呢啲NG場面㖭。