近日江湖傳聞21世紀通（241）將有大交易進行，雖然家陣尚未知搞乜，兼夾隻股停緊牌，但揸住佢只係3%嘅永義國際（1218），就借勢連炒多日，由0.11元水平一條氣炒上，噚日再升18.49%，收0.173元，成交金額亦增加至307.7萬元，經紀陳話可以留意。
唔好話小初有偏見，小初對呢系股票一向有戒心。永義呢系股票，可算係數一數二嘅抽水大王，炒上之後通常搞供股，但唔知點解次次都會有人跟風並中招，一眾股民輸完又輸，真係令小初十分難明。
永義去年9月供完股之後，隻股叫做靜過一排，淨係今年初成功以低價收i100（616）隻殼，同埋喺旺角有個樓盤開售之外就冇其他動作。
今次話就話21世紀通可能有大搞作，但以永義持股量咁細，就算真係有着數都唔慌多，唔算係炒作理由。
近排江湖傳聞炒家搵到新水源炒作，但小初唔敢立亂跟進，如果又要科款供股，咁就大件事。
慕容小初