財經事務局局長馬時亨一行三人上京見對口單位官員，行程十分緊密，真係前日早機去，噚日晚機返。
八方聽聞，馬仔前日坐經濟客位上京，遇到一班香港團友去北京玩，佢哋都好奇怪點會有幸坐喺局長附近，馬仔就即時解畫話政府𠵱家要慳錢，所以短程都坐晒經濟艙。咁又啱嘅，馬仔係特區管家，如果被人捉到佢亂花納稅人嘅錢，就好差勁啦。
馬仔第一次上京都算收穫良多，既見咗人民銀行行長周小川，又見埋銀監會主席劉明康同財政部嘅官員，臨走前重去埋港澳辦見廖暉主任同徐澤，可謂馬不停蹄。
八方一聽到佢去咗港澳辦，就猛問佢嘅隨員有冇撞到田北俊，點知佢哋話田少已經早走一步，咁廖暉有冇問馬仔五十萬港人遊行一事？佢答話自己乜都唔知，因為冇得入去聽滙報。
傳真︰2623-9278
電郵︰