本來23條是香港內部事務，阿董大可以港人治港作盾牌，自行決定暫時擱置立法，中央若有不滿，阿董最多被炒，斷估都唔使打靶。但阿董只識龜縮，推莊畀中央等候指示，由於中央需要考慮的因素遠比阿董考慮的為複雜，事件隨時演變成香港市民與中央的對立，中央領導層亦隨時出現政治角力場面。現在要憂慮的，已不是包圍立法會行動會否釀成暴動。
投資者採觀望態度，大市缺乏方向，唔計Tom.com（8001）10.35億元配股成交上板，大市總成交只得47.6億元。
阿董家族隻東方海外（316）噚日則勁升7.6%，收報12元，再創新高。此股勁升，主要因為有超人撐腰，不過現時坊間估計阿董就算唔下台，阿董政府都要變跛腳鴨，唔知到時超人重會否咁落力支持呢？有位前輩同阿虎講，東方海外噚日走勢似推高散貨，唔通真係樹倒猢猻散？
Tom.com復牌，股價竟然跌破配股價2.30元，收報2.225元，大跌9.18%。市場盛傳Tom會收購的鳳凰衛視（8002）則勁升7.78%，收報0.97元。市場又傳出Tom可能會入股電視廣播（511）旗下嘅銀河衛視，但電視廣播股價冇反應，跌1.85%，收29.10元。
科達（673）噚日停牌話有待公布股份交易。有消息話科達將發新股畀國康醫藥器材收購資產。其實早前已傳過呢個消息，由於未能證明交易毋須中國證監批准，故交易告吹。
阿虎