如果戴斯拿當日唔係左諗右諗，就唔使等多兩季，喺新一季就可以做拜仁10號仔。
原本係拜仁10號仔嘅史科沙，喺上季季初轉投凱沙羅頓，搞到件10號波衫冇人着。拜仁會長路明尼亞之後游說戴斯拿，希望佢喺新球季可以改着10號，但戴斯拿就喺度扭花，話唔想改冧巴；拜仁嘅商品銷售部有見及此，亦將大批印有戴斯拿個名同26號嘅拜仁新球衣推出市場。
雖然戴斯拿終應承做10號仔，但有關方面以賣咗好多件戴斯拿新球衣同重有存貨為理由，唔畀佢轉冧巴。拜仁啱啱出新球衣，起碼兩季後先轉款，戴斯拿隨時要喺兩年後先可做拜仁10號仔。
皇馬簽咗碧咸呢個萬人迷，梗係唔會放過任何用佢嚟sell嘢嘅機會。球迷只要上皇馬官方網，就會見到碧咸推銷皇馬會員卡，重講明會員係無分國界㖭！另外，碧咸接受訪問時不忘表明自己係個好老公，講他日退休後最想上月球，不過最終做啲乜，都係由老婆辣妹發辦！
前丹麥國腳杜夫亭因傷人坐監三個幾月後，喺星期四出冊，呢位三十四歲嘅中場知世界難撈，出獄後立即起程嚟中國搵班落。據講杜夫亭會喺中國逗留一個月，到甲A球隊天津泰達試腳。雖然杜夫亭脾氣係火爆啲，但不失為一個有級數好球員，我求大俠祝佢落班成功！
唉！講咗咁多年，被視為溫布頓網球公開賽英國奪標希望嘅漢文，都無法捧盃，喺星期四，佢又喺男單八強出局。漢文自己咁唔爭氣，唔怪得一早俾國會議員烏納金睇死，烏納金之前已經話：「如果漢文可以捧盃，就真係豬乸都會上樹！」
香港飛龍上年成為首支加入中國CBA聯賽嘅香港籃球隊，當時好多球迷都對中國新人王薛玉洋效力嘅飛龍寄予厚望，點知隊波常規賽打二十六場輸足二十五場，最近重盛傳仍欠落球員成幾百萬，班球員𠵱家重醞釀集體告佢，如果真係鬧上法庭，飛龍將成為CBA嘅笑柄。