昨日報載本港窩輪市場旺盛，成交額佔全球之冠。
最多人買賣嘅係恒指輪，有Call有Put。昨日最大成交金額窩輪，頭13件清一色係恒指輪。最多嗰件恒指Call9785，總成1.46億元，最細嗰件Put輪9712，都有千五萬銀。
下周股市見真章，政府如果就23條鬆章，恒指大升三二百點唔奇，但如果死牛一便頸，則散三二百點亦唔奇。買23條鬆章，買最多成交嘅恒指Call輪，即9785同9859，買政府死牛一便頸，則吼9843同9789。睇連日議員講嘢嘅口風，Put輪似乎博唔過。
仙輪波幅厲害，昨日代表作有電盈Call輪9662，收2.1仙，升11%，但高低波幅好大，最高2.5仙，最低1.7仙，波幅47%。電盈（008）高低波幅20仙，即4.3%，咁嘅波幅就令到9662大變化。隻輪9月底到期，溢價28%，槓桿率45倍。博正股兩個幾月內彈升28%，唔多實際，但到期之前，只要正股郁得三兩毫子，隻輪仍然會飛沙走石。
港交所（388）買盤強勁，收11.20元，升20仙，啲Call輪本來可以諗得吓。9537平水咁滯，但時日無多。9871年底到期，現價1.21元，溢價7.9%，槓桿率9.3倍。只不過，交投太疏，買賣唔係咁易。
章盛