童星出身的戴夢夢，五歲半時已踏足娛樂圈。在過往演出中，她最難忘的是與甄子丹合作的《新精武門》，劇情講述夢夢臨死前要一邊說話一邊嘔血，但她卻嘔不出，要甄子丹唧她的嘴才順利嘔血！
現年十八歲的環球歌手戴夢夢，五歲半時參加「小偶像競選大賽」贏得冠軍，繼而踏足娛樂圈。戴夢夢在亞視拍過八套劇集，包括《香港十大奇案之烹夫》、《第三間電台》、《新精武門》、《飄零燕》和《再見艷陽天》等。
戴夢夢拍攝劇集《香港十大奇案之烹夫》時，與劇中女主角翁虹結緣，二人後來還上契。夢夢日前說：「我同契媽好有緣，嗰時佢好鍾意我，佢同我媽咪講，話想收我做契女，就咁我哋就上咗契。」
夢夢有個不一樣的童年，身邊總是做明星的哥哥姐姐。她最難忘是十歲時拍攝劇集《新精武門》，飾演甄子丹的妹妹，當年甄子丹亦因此劇而跟萬綺雯拍拖。
夢夢說：「嗰年我哋要去陽春拍外景，嗰度好鄉下，又熱又焗，但劇情就講子丹好多仇家，佢要孭住我通山跑。佢重同我講話『夢夢唔好再高住啦，我就嚟抱你唔起』。我又好記得拍自己死嗰場戲，我要一路嘔血一路講嘢，但我嘔唔出，我就叫子丹唧一唧我個嘴，咁至嘔到血咋。」
年紀小小的夢夢，拍該場戲時居然睡着，她笑說：「場戲講我死咗唔郁，子丹望住我喊，拍拍下我重瞓着咗㖭。」
夢夢表示童年生活雖比一般小朋友多姿多采，然而並沒因此失去童真，夢夢說：「我自細就係個紮紮跳嘅人，放咗學就去踩單車，打羽毛球，搞到污污糟糟返屋企，阿媽重笑我似乞兒㖭。」
採訪：朱芷瑩
