二人男子組合Shine、Cookies、Boy'Z、Twins、陳奕迅等，噚晚喺銅鑼灣出席Neway卡拉OK活動，一向好受fans歡迎嘅Shine，近排就受到一個署名Steven嘅男fans騷擾，呢位fans唔止成日打電話整蠱Shine嘅女助手，重fax埋一啲極度核突不文嘅信件去佢哋嘅經理人公司，非常離譜。
Shine嘅女助手噚日同馮仁昭提起，話上個月已收到一個不明電話，話想請Shine上船演出，女助手就叫嗰個男人將啲詳細資料傳真去佢哋嘅經理人公司，點知佢收到嘅只係一封內容猥瑣賤格嘅傳真，徐天佑同黃又南知道呢件事之後，都覺得呢位仁兄搞埋啲咁嘅惡作劇好過份，希望佢快啲收手，唔好攞呢啲嚟玩，尤其係男人！
此外，噚日亦有報館收到歌迷傳真，表示佢哋不滿Juno（麥浚龍）老竇麥紹棠要求劉德華道歉，要展開「倒麥反龍」行動，罷買Juno唱片，Juno噚晚喺Neway活動上梗係撐老竇，佢話相信呢件事唔會對佢有影響。
陳冠希嘅兩位緋聞女友陳文媛（BoBo）同趙頌茹（阿Yu），噚日去咗新城電台出席活動，雖然阿Yu不斷咁同在場記者講話同BoBo好熟，但喺行動上佢就猛咁同再入樂壇嘅傅珮嘉攬頭攬頸，影大合照時佢同BoBo中間都隔住個啤梨，直至記者拉攏佢哋一齊，阿Yu至好唔自然咁企埋BoBo邊影相。
古巨基同內地演員黃奕因拍《還珠格格Ⅲ-天上人間》而傳出緋聞，噚日基仔喺台灣出席套戲嘅試映會時否認戀情，只承認同黃奕的確幾好傾，佢比較鍾意另一位內地演員秦嵐。不過，狄龍竟然話基仔同黃奕經常一齊喺片場失蹤喎。
韓國藝人安在旭噚日到咗香港準備拍攝廣告，佢上午十一點幾抵達機場，有十幾個女fans去接機。安在旭對於到場嘅影迷表現友善。影迷就送咗鮮花同生果籃畀偶像做見面禮，安在旭就當住fans面前學講「多謝」。離開嘅時候，安在旭同影迷揮手道別，表現依依不捨。
周麗淇噚日喺尖沙嘴街頭拍攝無綫劇集《玉緣》外景，喺劇中飾演劉松仁個女。起初佢以為劉松仁會係好嚴肅嘅人，周麗淇話：「合作熟絡咗後發覺劉松仁重好玩過我，佢同我爸爸真係有啲似㗎，所以我私底下都係叫佢做爸爸。佢重成日指點我，好好人。」
梁珮瑚噚日喺將軍澳電視廣播城錄影無綫節目《纖姿綽約身形像》，見佢着住背心短裙，證明踢走豬腩肉。梁珮瑚話自己修讀嘅法律課程已經考晒試。今年嘅港姐成日俾人彈唔靚，問佢以前有冇俾人彈，佢就話：「我呢啲八幾年選港姐嘅，以前啲人邊有咁挑剔呀！」
