譚詠麟於日前舉行的演唱會中避談7.1大遊行事件，但昨日他接受港台電話訪問時，卻表明並不贊成市民於下周三（九日）包圍立法會，他奉勸公眾應冷靜面對。不過導演張堅庭卻表示誓要反對到底，到時會到立法會抗議。
譚詠麟（阿倫）昨日接受港台《開心日報》電話訪問，被問到對日前有五十萬人上街反對23條有何看法時，阿倫說：「嗰日我由朝早溫總理演講，到走嘅儀式都有睇，冇得頂啦！人哋做出嚟係一個政治家嘅風範，係你想要乜嘢，佢畀乜嘢你，你想要開心、信心，佢講到清清楚楚畀你聽。」
阿倫續說：「我諗七一嗰日其實係太多嘢溝雜埋落去，太多民怨，買車事件、高官問責、沙士死人，我覺得政府真係要反省一下，你諗吓溫總咁高嘅官，一嚟到已經直踩去重災區。你有乜官？唉！自己反省一下，撫心自問，你有冇去到嗰度？」
阿倫又說：「大家市民亦都要小心喎，清清楚楚唔好搞亂，唔好撈埋落去23條嗰度喎，23條一定要立法，但係咪一定要咁倉卒，唔知啦，呢啲佢定啦，發自內心就已經OK，呢樣嘢已經足夠啦，千祈唔好勝利沖昏頭腦。」
下周三23條將恢復二、三讀立法程序，李卓人透露會再發動市民圍繞立法會以示抗議，阿倫奉勸市民應冷靜面對，他說：「唔好話嗌多幾嗌就去包圍立法會，呢樣嘢前車可鑑，睇吓六四嗰時啲學生着晒睡衣上去撐，千祈唔好咁樣，唔好自己搞垮自己地盤，全世界睇住我哋，冷靜啲用第二啲方法，千祈唔好咁樣，呢個係我自己個人嘅表白。」
而日前自願上街參加7.1大遊行的張堅庭則在電話中說：「我唔擔心呢個被指係犯法活動，因為都係去立法會外靜坐示威，行為都好理性，我覺得特首董建華喺7.1大遊行後連日都冇表態，佢嘅行為根本係羞而不決，我好同情佢，唔好將歷史地位同七百萬市民掛鈎。」問到張堅庭到時可會帶同妻兒一同參加包圍立法會，他說：「總之喺安全情況下，我會帶同太太同仔女去感受吓呢啲氣氛，咪當係活動教學。」
此外，張同祖亦說：「七月九日去唔去立法會我都係要睇政府呢幾日嘅表態。」而張婉婷則說：「有啲議員話上街嘅市民係俾人誤導，呢啲講法好乞人憎，唔通上街嘅五十萬群眾係冇腦嘅？𠵱家市民唔可以再沉默，應該登記做選民，選出為民請命嘅議員，唔要保皇黨，我希望政府能修改23條。」
採訪：比華利
