7.1盡顯人民力量嘅可貴，正如銀行家李國寶說，有好多人都唔贊成23條，但係冇上街，言下之意，就係不滿嘅人何止五十萬。
其實八方當日企喺軒尼詩道數，根本數唔掂，因為成條街都係人，好似潮水一樣，一浪接一浪。
之後有班學者，用高科技去點算人數，都係驚會有遺漏，所以唔肯公布遊行人數初步結果，話要等埋鍾庭耀嘅問卷調查。
等嚟等去，八方一個老友終於沉唔住氣，話差佬內部有個評估，如果維園唔係迫爆咗，好多人中途頂唔住，以及計埋六點前條數，人數有近六十五萬人。
好多人都睇到嗰日好多青年學生組隊遊行，八方就遇上七個嚟自屯門永隆中學嘅中六同學，舉住塊「討厭極權」嘅紙牌，佢哋話，政府太過份，呃香港人，重呃全世界人，所以一定要出聲。
（圖）呢班中六學生高舉「討厭極權」紙牌，聲討政府欺騙全世界人。
傳真︰2623-9278
電郵︰