海外車訊：
四個聰明人SmartForfour

早前，Smart宣布會推出新款四座位Forfour型號，登時惹來全球車迷注視；到最近，廠方終於公布關於Forfour嘅更多資料，新車不僅外形屬全新設計，多個引擎配搭選擇，亦能切合用家需要。不如𠵱家趁新車響明年春季推出前，一齊嚟先睹為快啦！

記者：郭信強
逢星期一至日出版

車廂闊落舒適度高
從廠方公布嘅數據中顯示，全新SmartForfour車長有3752mm，但軸距卻長達2500mm，可想而知佢嘅車廂空間係幾咁闊落，就算坐滿四名乘客都未覺擠迫㗎！然而，新增嘅後排座椅雖以乘坐兩名乘客為主，但用家可選配後排三座位布局，而且每個座位都備有頭枕及安全帶，從而為車上乘客帶來更佳保護。另外，車內更備有多個雜物匣，頂級版更備有天幕式車頂配搭，當然唔少得重有多個安全氣袋組合，以保障乘客安全㗎！

獨特造型吸引性高
以造型而言，全新SmartForfour要較現有SmartCity-Coupe及SmartCabrio開篷型號來得更具號召力，皆因佢車身線條獨特之餘，就連頭燈亦屬新設計，望落份外有吸引力。

多台引擎任你揀
雖然現有SmartCity-Coupe及SmartCabrio，只有一台698cc直3Turbo偈作配搭，但新車卻有多台引擎供用家選擇，當中包括有1.1公升直3（77匹）、1.3公升直4（98匹），同埋1.5公升直4（112匹）型號，而且佢哋重有運轉寧靜及低耗油量嘅特性㖭！除此之外，剛勁有度嘅底盤配搭，響多套電子系統如ESP等等嘅輔助下，無論拐彎又或者係日常行車，都能夠畀到人有十足信心呢！

同場加映
Smart產量衝破500,000部
新一代城市小車Smart自推出以來，一直備受各地車迷追捧；雖然香港方面要到去年才由代理正式引入，但銷情仍見不俗，風頭可謂一時無兩。另外，廠方更於日前隆重宣布，第500,000部Smart、並屬於SmartCabrio（銀色）型號嘅新車，經已於上星期六（6月28日），離開咗位於法國Hambach嘅生產線，而且重快將送到車主手上㖭！
同一時間，第500,001部Smart則係一部SmartCity-Coupe型號，而且亦快將離開生產線，並運往澳洲市場出售㖭！能於推出後短短數年間，便已製造出超過500,000部新車，不但令廠方大感欣慰外，亦能同時顯現出，Smart係幾咁受車迷歡迎呢！