自從落實咗汽車首次登記稅制後，到港新車可謂一浪接一浪；而亞Mark早前披露過，話經已有新車秘密抵港嘅平治Maybach，雖然代理遲吓9月等埋廠方高層到港，才會隆重其事搞車展同新陳列室嘅開張儀式。惟亞Mark得知代理會響嚟緊7月10日（星期四），假座淺水灣陳列室搞個Maybach嘅傳媒預展。當中，除咗部Maybach（車價約500萬元起）有一定號召力外，其次會係呢所有兩層高嘅Maybach專用Showroom。皆因日後對Maybach有興趣嘅人士想睇車的話，例必事先透過預約，由專人帶領方可睇車，完全唔會接受Walk-in客㗎！再者，陳列室底層重設有一個尊貴嘅車房，以供睇車嘅商賈富豪作泊車之用；而日後Maybach一切維修事宜，就會交由仁孚行位處紅磡大樓內嘅專責人員負起工作喇！係咪好Professional呢？