大遊行後，港股連續第2日上升。政黨人物講23條，似乎口氣軟番啲，如果有偈傾，恒指有望好快上見一萬。
博23條有轉圜餘地，直接買大市升，可以揀恒指Call輪落手，對象有3件，就係9711、9785同9879，其中9711今個月底夠鐘，溢價低而槓桿率大，最跟大市。
H股下晝忽然勁炒，但啲紅籌則仍然唔多得，例如華創（291）收6.75元，跌15仙。紅籌國企是一家，國企得，紅籌有機會跟番上去，吼華創Call輪9270，9月到期，現價5.6仙，溢價4%，槓桿率12.1倍，低買高賣，炒波幅。
呢幾日，地產股麻麻，但大市若然好番上去，地產股亦會有追落後情況。昨日4大地產股，長實（001）同恒地（012）有進帳，新地（016）冇郁，新世界（017）跌2格，可以搵啲地產股博吓反彈。
長實收46.70元，升1格，跑輸畀和黃（013），和黃升40仙，收47.90元。兩者先幾日同價，𠵱家相差1.20元，和黃有大股東不斷增持，遲吓點都帶起埋長實。地產股Call輪，優先揀長實輪。
長實Call輪搏殺對象係9764，9月到期，現價16仙，溢價8.4%，槓桿率29.2倍。唔想咁大刺激，則選擇較遠期嘅9829，隻輪11月到期，現價45.5仙，溢價6.1%，槓桿率10.3倍。
章盛