更緊密經貿關係安排（CEPA）簽訂後，全城工商界一片喜形於色，因為有CEPA總係好過冇CEPA，專業人士更多咗一條到內地發財路㖭。
之不過，CEPA究竟如何落實，大家仍在等。譬如我哋食飯時恭喜藥王T，以後產品可以內銷，唔使交關稅。藥王T話：「咪恭喜住，𠵱家淨係外貿部講嘢，衞生部冇出過聲。藥物輸入內地，一定要衞生部OK晒啲程序，我哋重要慢慢睇定啲先。」
恭喜律師洪，律師洪又話：「閘住先，你估咁易乎，要考內地律師牌，及格率只得六巴仙，好難考㗎。」考內地律師牌、會計師牌，難於登天，一來兩地制度唔同，概念迥異，讀完晒內地課程，唔等於會及格；其中一個原因據講係香港專業人士的中文唔掂，港式中文（即劣等繙譯歐式中文），內地考官睇唔明！不過內地永遠有政治掛帥這回事，用考試及格率嚟調校律師人數，係控制法界嘅一個方法。
律師洪話明要參與遊行抗議二十三條，左丁山問佢：「假如有警務人員簽手令搜查某人屋企，某人唔順，可唔可以向傳媒自行爆料，大聲講：我屋企俾人搜呀！」律師洪話：「未必得㗎，假如官方話搜屋涉及國家機密，你爆料就係洩漏國家機密，傳媒報道又係涉及國家機密，所以即使你唔怕死係咁噏，都未必有傳媒敢報道！」咁就死火咯，以後多嘴人俾人拉咗都冇人知，問你驚未。