趙飛雲前日提過港股踏入7月後走勢變得波動，可以部署一對恒指輪炒上落。
美股杜指周二單日轉向後，周三再升101點，收9142。港股承接美股升勢，早市初段高見9705，其後無力再上，趙飛雲在0.206元買入50萬份恒指Put輪9789，恒指果然繼續大幅波動的走勢，午市初段，恒指一度倒跌9點，恒指Put輪9789高見0.229元，其後見恒指跌唔落反彈，在0.219元沽出獲利，尾市見恒指升唔上，又在0.22元買回30萬份9789，博美股在美國國慶假期前出現獲利回吐。
美股噚晚只有半日市，今晚則全日休市。由於今晚假期關係，就業數據提前於噚晚公布，除非數據靚過市場預期好多，否則美股假前出現獲利回吐機會較大。美國近年仇口愈來愈多，連趙飛雲都憂慮有恐怖分子趁美國國慶搞事，更何況當地的投資者，加上近排港股表現偏弱，外圍就算上升亦跟唔足，所以覺得恒指Put輪博得過。
七一大遊行只係香港市民反惡法行動的開始，港府若不作讓步，7月9日包圍立法會的集會，未必好似七一咁和平，隨時會搞出大頭佛。呢個亦係港股近期最大不明朗因素，事件未露曙光前，港股難有好表現。
外資大行老友亦話，芬佬十分關注事態發展，近日港股升至9700水平即見有人沽貨減磅。外資對政治取態較為敏感，若覺得當地出現政治危機，定會影響投資信心。綜合而言，23條搞唔掂，港股易跌難升。
趙飛雲