經濟唔好，大部份業內人士都睇淡寫字樓市道，但係高力國際就有唔同嘅見解，佢站喺用家嘅角度嚟解釋，話𠵱家環境有利公司擴充。
高力國際剛發表嘅亞太季刊，對區內寫字樓前景樂觀。以香港為例，雖然租務交投主要來自續約同公司重組架構，重因租務需求疲弱，加上國金二期供應量逾一百八十萬方呎，令到核心區同邊緣地區嘅租金距離拉近，料未來會進一步收窄㖭。不過，咁樣就為一啲貿易同與金融業冇關嘅公司，提供一個改善工作環境嘅機會，即係終於有機會再度重返中區。
報告又提到內地寫字樓同樣出現呢個現象，啲物流、證券、保險同電訊公司，紛紛升格租用優質商廈。
不過，報告預料今年北京商廈租金會回軟，但上海同廣州就會升。
長實嘅東涌映灣園二期映濤軒同公益金搞慈善活動，以卡通人物HelloKitty做主題人物。為進一步標榜個度假式會所，特製四款造型嘅HelloKitty禮盒，送畀睇樓人士。禮盒重有彩虹裝飾背板，盡情展現HelloKitty充滿陽光氣息同動感嘅一面。
長實郭子威話，呢個係限量版嘅禮盒套裝，第一批準備五千份，只要今日，同嚟緊嘅禮拜六日，參觀映濤軒，就有機會得到。不過，禮盒數量有限，先到先得。
另外同系紅磡海逸豪園，過去一個月賣咗三十八伙，成兩億三元，成績都算唔錯。
物業買賣涉及金額可大可小，加上代理經常要接觸法律文件，香港置業培訓及發展部主管葉國雄，就搞咗個法律常識講座，請律師主講，以座談會同案例分享形式，等同事加深認識有關法律條文，避免犯錯。
主講嘅鍾卓成律師引咗一個案例，指曾有代理以為頂層單位應該連天台業權，所以喺臨約裏面只填頂層單位就算，點知原來個單位同天台業權係分開嘅，代理喺理虧嘅情況下，結果要出錢買咗個天台業權畀個客。所以話凡事唔好以為想當然就得，唔係隨時好大鑊㗎。
炎炎夏日，發展商搞記者會同活動，已經不再是傳統坐定定嘅形式。好似九龍倉咁，今日搞海上之旅，率先租用重未正式啟航嘅維港觀光遊輪，帶傳媒在海上一睹旗下深井碧堤半島外貌，同二期嘅建築進度，順道睇埋就快落成嘅葵涌工貿項目都會坊。
聽講，呢隻遊輪係由天星小輪改裝而成，會接載遊客，喺維港一帶航行觀光。下個禮拜至正式行下水禮，今日就率先由九倉帶領記者登船兼啟航，近排天氣咁晴朗，暢遊海上最啱不過。
中環皇后大道中九號嘉軒廣場三樓全層，早前由豪宅投資者以二千二百六十八萬購入，聽講佢係第一次買舖，現由髮型屋租用，月租十七萬五千，回報有近九厘三。交易唔只係一宗普通買賣咁簡單，重包括埋大廈平台嘅特色鐘樓。
據促成呢宗買賣嘅代理講，三樓地契裏係包括個鐘樓，但買家就冇管理權，唔可以拆咗個鐘，又或者換過新嘅。之不過，當個鐘壞咗，業主就要負責部份維修費，唔知個買家清唔清楚對個鐘要負咁大嘅責任呢？
蘭西
電郵地址：
