啱啱畀人封咗做新一代妖男嘅成宮寬貴，出現親都會髹到自己啲手指甲黑晒，影雜誌相嘅時候，重要搽晒口唇膏同着到鬼五馬六咁，其實佢咁博無非都係想喺一大班新男星中突圍而出啫。佢拍完《新高校教師》之後，妖妖哋嘅男妓角色確實係出晒位。但我羅拉收到風，呢位二十歲嘅弟弟原來對於扮姣已經好討厭，最近佢喺處男寫真集《I'm...》入面，突然洗盡鉛華，做番個普通、又帶有少少儍氣嘅陽光男孩。
講真我羅拉當初都係畀佢一身奇裝異服吸引，今次睇見本寫真集嘅封面，都知道成宮玩番正路嘅靚仔形象，但諗住入面點都有啲怪look睇吓啩，點知成宮一心做個平凡「日版JUNO」，連佢排大大抽嘅耳環都除埋，初時我羅拉都幾失望㗎。
但睇睇吓又覺成宮又表演吊樹又做出水芙蓉，其實夏日炎炎大家都係想睇呢啲透心涼嘅畫面啫！我羅拉重收到風，話呢本寫真喺日本出咗幾日，去貨去得好快，始終妹妹fans見到自己偶像嘅出浴同露腋下毛照，點都有啲會按捺不住嘅。