黃伊汶轉走性感型女路線，至今已花近六位數字積蓄置裝，她坦言今次轉形象不成功便成仁。對於外界將她與舞后Yumiko作比較，她滿有自信地說：「我唔想被比下去。」
黃伊汶（Emme）由乖乖女形象轉走性感型女路線，憑大跳辣身勁舞圖殺出血路，有傳她因此與同走性感舞后路線的鄭希怡（Yumiko）鬧不和，外界亦不斷將二人比較。
早前Yumiko曾在公眾場合避見Emme，後來得譚詠麟做和事老，兩人才成功合照。對於經常與Yumiko比較，Emme日前在尖沙嘴接受訪問時說：「我都控制唔到，可能我哋形象相似，就俾人歸埋同一類。我覺得係好事嚟嘅，令自己要做得係更加好嗰一個，好似比賽咁，我唔想被比下去，做呢行，競爭就一定有。」
不過，有報道指Yumiko一見到Emme即速閃，Emme笑說：「我同佢之間冇芥蒂，我哋有傾有講，但係做嘢嘅時候，身邊嘅同事幫藝人去爭取一啲嘢，就會有摩擦，我同佢冇唔妥，係周遭嘅人太敏感啫。」
問Emme會否視Yumiko為假想敵？Emme說：「又唔會嘅，我挑戰自己多過去諗點樣打低人哋。」這次Emme博到盡轉形象，問她是否不成功便成仁？她即說：「係㗎，機會唔係必然，之前我出嗰兩張碟，畀人感覺好模糊。」
Emme續說：「呢次公司都用咗好多錢贊助我學跳舞，不過去日本受訓嗰幾個月，我冇收入，返嚟之後，又攞晒之前賺嘅錢去買衫，花咗成六位數字。𠵱家我好窮，冇晒積蓄，但我相信有回報嘅。」
Emme又歎謂：「啲人成日以為我屋企好有錢，邊有呀？屋企層樓供到死吓死吓，媽咪都係開間美容院仔，家姐就幫媽咪手，我哋個個月都要計數㗎。」
採訪：朱芷瑩
攝影：陳慧安
髮型：CarrCheung（Chin.G）
化妝：RickyLau
服裝：Celine
場地：瑪哈巴
