嚇死人冇命賠嘅《SilentHill》系列出到第三集喇，硬Sell血腥加獨一無二嘅恐怖感，追開都唔會失望，加上今集行貨都有初回CD送，就真係幾抵吓，現市價約$360左右。另外，上集勁多女仔買嘅《蚊》，今個星期會推出續集《蚊2》，想𠱁女朋友嘅就要留意。至於上星期推出嘅《三國志戰記2》同《頭文字D》，價錢亦冇乜升跌，前者約$390，後者$340左右。
上星期尾XBOX宣布咗減價之後，加上又有遊戲一齊減價，同埋CAPCOM勁Game《恐龍危機3》撐場，個市好明顯多咗人買機，代理亦加強咗宣傳，月尾推出隻《MidtownMadness3》亦會係谷機之作，未買機就不妨諗吓。
上次部Pokmon限定版GBASP，因為冇乜賣點，搞到好多舖頭都損手離場，但係嚟緊暑假又有連續兩款限定色主機登場，咁就要睇睇今次邊款可以跑出喇！先嚟會有《我們的太陽》黑紅色主機，喺今個月17號打頭陣，8月29日就有《新約聖劍伝說》限定色主機，兩部定價都係約$1,200，已經連埋遊戲，你又會買邊款呢？
文：打機鐵人