好多人唔明點解記者反對23條，以為係杞人憂天，其實八方係行內人，知道得比大眾早少少；此惡法對新聞界嘅影響，未立法已開始見到。以言論獨立見稱嘅《信報》，噚日創報三十周年，但老闆林山木，同埋該報元老曹仁超喺佢哋嘅專欄，都話因為23條呢把刀，今年冇心情搞慶祝活動。
7.1第一次參加大遊行嘅林山木（筆名林行止）罕有地用咗半版評論講23條對報界嘅影響，佢話，𠵱家感到辦報到咗最嚴峻關頭，23條對新聞界非常不利；如果23條以𠵱家呢個版本通過，搞報紙隨時會犯法，佢會諗諗《信報》係唔係可以繼續做落去。
八方噚晚問林老闆點解咁悲觀，佢透過同事解釋，話只係講出主觀擔憂，尚有好多考慮；九六年都諗過《信報》能否辦下去，𠵱家再諗，但唔等於通過國安法就停辦。
連北京領導人都話經常睇嘅《信報》，因為23條，發出可能停辦報紙嘅警號，你話係咪杞人憂天？八方係《信報》嘅長期讀者，如果佢唔做，香港有獨立聲音嘅報紙又少一份。
有人又話叫我哋信佢；不過大家信之前可以睇睇同中國關係好好嘅郭鶴年旗下嘅《南華早報》，噚日佢哋喺頭版報道，周三出版嘅《南早》，因為有7.1大遊行嘅新聞，已經唔准喺內地酒店賣。第日23條通過，唔畀你賣，可能已經係最最最輕嘅懲罰了。
（圖）《信報》創報三十年，老闆林山木夫婦因為23條而諗緊係咪可以繼續做落去。
資料圖片
傳真︰2623-9278
電郵︰