陳加玲與羅傑承分手多年，本來以為再見亦是朋友，更合作做生意，但近日二人卻掀起錢債糾紛，陳加玲指羅傑承於年半前與她一起參與一宗生意後，未有將她應得的一千萬元還給她，揚言誓要追回應得的金錢。
陳加玲與關心妍所屬的BMA唱片公司老闆羅傑承已分手多年，但二人近日卻掀起一場錢債糾紛，陳加玲聲言要向羅傑承追討過千萬元的應得利益。其實早於今年一月時，陳加玲已向外表示曾幫助一名友人解決財政問題，其中一單生意涉及八位數字的投資金額，但生意做完後，該名朋友便忽然失蹤，由於彼此間尚有錢銀轇轕，她更公開表示，希望對方解決自己的財務困難後主動現身，否則便會爆大鑊。
據悉陳加玲口中所指的朋友，正是其舊愛羅傑承。昨日記者致電向陳加玲求證時，她承認道：「冇錯，最近我同羅傑承係有錢債糾紛。好多年前我同佢有好多生意來往，十年前佢叫我出西貢一塊地，合作起兩幢三層高嘅丁屋，價值約一千萬，由頭到尾都係我同屋企人攞過三百幾萬出嚟，佢一直冇出過錢，但係一直空置十年都未起過，搞到我塊地白白空置咗成十年，你話條數點計，呢筆錢我家人有份出嘅，我始終要同屋企人交代。
「我最嬲係佢喺年半前打電話畀我，話有一單生意需要資金，佢叫我幫手搵投資者，咁我真係幫手搵到，單生意重有一位金融界朋友一齊合作，大家傾好單生意係三人平分所有利益。」
陳加玲續說：「羅傑承先收咗首期三千萬嘅現金，後尾因為合作嘅一方出咗事，單生意唔可以繼續落去。撻定之後，我問羅傑承攞番我應得嘅一千萬利益，佢竟然同我講話啲錢已經用晒，𠵱家根本冇錢畀我。我由年頭開始追佢錢，但佢影都冇，咁搞法，我惟有交畀律師處理，由法庭去裁決。」
另一方面，陳加玲又表示二人相戀時，她已對羅傑承仁至義盡。陳加玲說：「我同佢咁多年，我幫佢嘅錢銀數目有幾多，佢自己應該心裏有數，好似好多年前佢喺澳門出事，要我攞成幾十萬去澳門保佢，但後尾佢都冇畀番呢啲錢我。另外，佢之前投資拍《那有一天不想你》唔夠錢，又係我借咗幾百萬畀佢開戲，後尾佢只係斷斷續續咁還番一啲畀我，不過呢啲我都唔同佢計，但年半前嗰一千萬應得利益，我就一定要追討，𠵱家一切文件已交咗畀律師睇，好快可以正式行動。」
對於陳加玲有關欠錢方面的指摘，羅傑承昨日在電話中回應說：「當年有關西貢起樓嗰件事，係我出錢買地，但最終因為多種原因起唔成，當中唔存在我爭佢錢。」但陳加玲又指與羅傑承合作拍戲欠她錢，羅傑承解釋說：「其實當年拍嗰套戲，陳加玲係以投資者身份參與，最後套戲都蝕錢收場，就算佢（指陳加玲）當有投資都唔緊要，蝕嗰部份我一早都還番畀佢，我手頭上都有晒證明文件。」
問到羅傑承若陳加玲要與他對簿公堂時，會如何解決？他說：「佢要咁做，我冇所謂，我有晒證人同文件，我覺得付諸法律解決都未嘗唔係好方法，不過以前大家一場朋友，無謂搞到咁僵。」
採訪：陳月媚
