經紀黃上個月底提過比亞迪（1211），話股價上升只係mark高造半年結，但家陣都已經踏入7月份，而比亞迪重返18元，就快升至1年高位。小初走去揶揄經紀黃一番，佢不但當冇件事，重彈隻同類嘅電池股光宇國際（1043）畀小初，話隻股有芬佬睇中，高處未算高。
光宇自從4月份公布全年業績盈利上升後，股價一直穩步上揚，噚日又升3%，收2.50元，唔經唔覺創下1年新高。
經紀黃話，隻股向來都有班大陸炒家睇住，所以股價一直好硬淨。不過，光宇近期嘅走勢同陣容，似乎係因為傳有芬佬睇中。
近排有啲芬佬，只要公司有錢賺及有息派，就叫人哋批一手貨出嚟畀佢炒，股價有時可以高到你唔信。
另外，上周掛牌嘅聯華超市（980）同味丹國際（2317），在消化完獲利盤之後，噚日一舉炒上，前者升3.07%，收4.20元，後者更升10.42%，收1.06元。經紀黃話，一早都話呢兩隻股未炒完，據講近日有芬佬密密收集中。
慕容小初