下月二號喺北京同皇馬友賽嘅龍之隊，有可能由幾支中國甲A球隊組成，但係球會希望專心應付聯賽，唔想派兵。
中國足協基本上同意將當日部份賽事讓路，畀球會可以派兵應戰。不過班霸大連實德方面就表態，只想集中精神角逐聯賽同亞冠盃兩個冠軍，對友賽唔多關心；其他球會亦持觀望態度，始終係唔想影響聯賽成績，而最難做梗係國足班球員，順得哥情失嫂意。
我求大俠覺得龍之隊組軍已經阻礙多多，如果皇馬嚟香港賽期最終落實，國腳到港難上加難，就算鄰區深圳肯畀楊晨等幾位國腳幫手，亦湊唔夠數；不如考慮吓「郭指導」提議畀香港球員踢重好。
山度士啲主將始終都係質新，噚日響自由盃決賽次回合最終唔能夠收復失地，重輸多場㖭。不過山度士教練李奧就表現番名牌教練應有嘅氣派，場波未踢完已經走定去恭賀小保加教練比安基，比起首回合賽後彈人哋隊波贏波靠運，呢次就有風度得多嘞。
據古華特個經理人講，呢幾日無人聯絡到古華特。原來巴塞高層決定向高薪嘅佢開刀，聽講減薪幅度都幾高，𠵱家會方公布玩失蹤嘅古華特必須響今個月十七號前決定簽唔簽新約，否則會割價賣走佢。重以為列卡特加盟班荷蘭球員會好景㖭……。
托迪本笑話集面世兩個禮拜後，已經售出十五萬本，高踞銷量榜之首。呢本書咁好賣，主因係內容夠出位，攞唔少包括托迪自己在內嘅意甲球圈人士，甚至佢女友芭拉絲嚟講笑。呢本書嘅收入將會捐去聯合國，身為聯合國大使嘅托迪又有善心，又夠魅力，抵讚。
前紐約人老大哥伊榮上年靠佐敦射住，做咗巫師助教，點知「波神」畀巫師班主飛起後，伊榮都要執包袱。不過伊榮話晒係NBA老江湖，人面夠廣，最近佢又跟到前紐約人教練雲根迪，做咗火箭助教。我求大俠衷心祝福「大猩猩」唔好再跟錯大佬。