香港人，真係做乜都快過人，連玩馬戲這樣需要大量訓練的玩意，都可以濃縮成九小時的課程，小朋友就可以做到空中飛人、玩花式彈床，連拋接三、四個波都做到。如你嫌九小時還太長，以香港人的速學速成性格，原來連短短二十分鐘的速成班中，五歲的小Emma，經教練講兩講，示範一次，玩過一次空中鞦韆，就可成功做到兩粒星難度動作──倒立！如此快速的學習方法，我想，只有這個城市的人，才做得到！
記者：梁佩芬 攝影：陳智良
馬戲訓練班適合6-16歲小孩學習，重頭戲是空中飛人。三堂內，當然難似專業飛人，在空中左右大迴環，轉身翻騰，穿過三個人再上番鞦韆，但至少都可以喺離地三米的高空，做倒立、大鵬展翅及小拱橋等三粒星高難度花式。不過，年紀愈小，教練的協助會愈多，為安全，他有時會全程都不放手，捉實你練習。年紀到十歲，會提升難度，做到花式後，更放手讓你嘗試騰空感覺。但無論年紀多小，上空中鞦韆首先要夠膽，否則只可坐在地上，看同學仔玩！
5歲Emma，從未睇過馬戲，今日是第一次看到空中飛人，也是第一次上高三米的鞦韆上。未上鞦韆時，Emma默不作聲，眼仔睩睩看着教練示範做倒立動作，我以為她會膽怯，不願上架。當教練抱起她時，亦面露笑容，還主動伸直雙手，一次就捉實鞦韆架，一個正確的垂直動作就做到，接着的倒立及分腿動作一樣話咁快就做到，小妹妹果然犀利！反而，同是第一次上架的David（6歲），卻不敢垂直身體吊起來，死也不肯做倒立動作，不到一分鐘，就要落架，還淚流滿面，小弟弟，有啲失威喎！
10歲的Zak，之前喺澳洲看過馬戲，最鍾意就是空中飛人環節。一知道有馬戲班來港，即刻約埋朋友Shiv及Alex去玩。愛打籃球的Zak，手腳非常靈活，不消一刻，就上了鞦韆，揮灑自如，看他所做的大鵬展翅動作，與教練示範的，也不相伯仲！
教練Rodleigh來自澳洲著名馬戲學院Trix，有三十多年教授經驗。他說學馬戲當然要講求天份，膽識及柔軟度都是與生俱來的；從學習玩馬戲中，亦可訓練孩子的自信心、合作精神及身體協調性，就算短短兩三日，收穫也甚豐富。
如果，你覺得空中飛人難度太高，又想過吓做馬戲的癮，不妨玩其他如跳彈床、打觔斗及拋球等雜技，動作雖輕巧，若要做到似模似樣，所費心機也不少，要成功也要下苦功。
彈床有兩種玩法，一是個人花式，簡單如分腿及抱膝，高難度有凌空翻騰；二是雙人花式，講求合作性，難度也比單人為高。
打觔斗有數個不同方法，前後滾翻、前後手翻、雙人翻、側手翻，着重平衡及手腳協調，小小年紀連打四個前滾翻都唔頭暈，勁！
常常懷疑玩拋接球的，一雙手怎可以同一時間拋接五、六個波呢？玩者要有冷靜又處變不驚的情緒，練得多，真是EQ都高啲！
東薈城馬戲學院
為迎接遲來的暑假，馬戲學院於八月正式開啟，有興趣學小雜技或空中飛人，就要趕快報名。
課程一：空中馬戲雜技課程
內容：空中鞦韆、空中柔軟體操、呼拉圈操及垂吊訓練等。
日期：8月5日開始
學費：$900，共三堂，每堂三小時及一個畢業表演。
課程二：傳統馬戲雜技課程
內容：跳彈床、翻觔斗、踏高蹺、叠羅漢等。
日期：8月5日開始
學費：$600，共二堂，每堂三小時及一個畢業表演。
報名辦法：可致電28155855或電郵
截止報名日期：8月1日