阿董做咗特首六年，日日都只係識得保住啲官，問責制形同虛設。身為問責官員之一嘅教育統籌局局長李國章好似好明白問責制嘅重要性，噚日巡視粉嶺救恩書院時，向十幾個學生會候選人，大談問責之道。
救恩書院兩個內閣「三瞻八閣」同「A1」十幾個成員，與李局長第一次會面，就俾局長問到口啞啞。
李局長問：「你哋係民主選出嚟，如果學生要罷課，你哋會點做？」十幾個學生估唔到局長會問啲咁深嘅問題，即時你眼望我眼。有啲答：「唔會有咁嘅情況」，有啲就話搵老師、搵家長幫手。但係局長擰擰頭，似乎唔係好認同答案，做唔到向選佢哋學生負責。
最後有個男同學話如果遇到唔合理嘅訴求，就算由民主過程選出嘅學生會都一定唔支持。
李局長似乎幾認同呢位同學仔講法，重學咗董太話「係、係、係」睇嚟呢位同學好有潛質做民主問責官員。
講完之後，李局長繼續巡視學校，重喺美術室牆上畫咗個公仔頭，鼓勵同學多啲創作。
（圖）李國章同救恩書院嘅學生會候選人大談問責之道。
傳真︰2623-9278
電郵︰