雖然上半年市道唔多好，但係豪宅盤嘅銷路卻喜出望外。好似電訊盈科嘅薄扶林貝沙灣，第一期已經差唔多賣晒，營業市務總監顏金施話，除尚餘幾個複式之外，逾千呎單位賣清光，所以噚日將三個裝修豪華嘅逾千呎示範單位關閉，準備第二期。
錯失參觀呢個包裝豪華嘅新盤，就要等到今年底至有得睇新一期嘞。
不過，為咗畀市民親身體驗個樓盤擁有嘅舒適環境同海景，售樓處對開嘅花園長廊同展覽館仍會繼續開放。
貝沙灣第一期有544個單位，顏金施話，賣晒可套現近四十億，可以話係今年上半年售樓收益數一數二嘅豪宅新盤。第二期單位最細千一呎，發展商意向呎價五千蚊，如此推算，入場費要五百幾萬，而家一期重有幾個700幾至800餘呎兩房供應，價錢330多萬元。
恒基嘅尖沙嘴豪峰軒招緊租，喺報紙賣廣告自然少不了，呢個中文廣告中，加插咗一句日文，由此可見日籍租客都係佢哋嘅目標，估計都係因為呢類客準時交租，又會保持間屋整潔，第日發展商要轉租為售，都唔使大翻新。
發展商近年喺賣樓賺錢之餘，都會回饋社會，新地今個月19同20號，會舉行「愛心小熊滿恩光」籌款活動，為將軍澳靈實恩光學校籌款，耗資約一百萬元，興建全港第一個感官花園，新地重會負責部份費用。
感官花園面積萬五呎，係將校內嘅戶外操場擴建而來，設計意念參考外國同類花園，配合治療課程，為嚴重弱智學童提供治療，明年底落成。
講開新地，佢哋噚日原本同商務印書館，及瑜伽教練黃佩霞一齊喺銅鑼灣搞記者會，推介元朗YOHOTown嘅前瞻式生活，同提倡個人增值，點知臨時取消，改咗入元朗，公布首批單位呎價，由周國賢主持大局。
由田氏家族統領嘅鴻運地產，雖因市道不景迫上結業之途，但好快又再打過江山。田國強帶同唔少夥計，加盟主攻上海房地產嘅金豐易居之際，細佬田國輝則加入利嘉閣，負責上水市場。田國輝謙稱，今次加入新公司，有唔錯發展空間，會學習見識唔同公司嘅文化。佢重話，今次係做「開荒牛」，因以前做過元朗同馬鞍山，第一次駐紮上水，希望建立到好成績，相信喺兩條腿走路底下（即喺一手同二手住宅都做），會有成績。
蘭西噚日提到中原後勤員工有花紅分，佢嘅對手美聯話，上半年都有錢賺，但要睇主席黃建業點決定，按慣例後勤應該有花紅分嘅，不過限於有勞者得。其實美聯喺5同6月都有調整過員工薪酬，但只係對啲人工偏高者。
另外，利嘉閣董事總經理何紹章就話，上半年有微利，但因為舊年只係得幾個高層減咗人工，今年就冇減過，加上之前出現虧損，所以要睇埋下半年成績先至決定派唔派花紅。
蘭西
電郵地址：