真係好既唔靈醜既靈，平時經紀陳話會升嘅股份，未必隻隻升，但話會跌嘅股份，就通常會跌。好似佢前日一路遊行一路講嘅展鴻（572），噚日新掛牌，就較招股價插水35%，真係肉酸得好緊要。
經紀陳話，最離奇係展鴻招股價1.23元，有乜理由第一口價成0.95元，認真耐人尋味。如果今日隻股大幅波動，佢亦唔會覺得奇怪，因為可能係未沽齊貨，托高價再沽過。佢叫小初唔好以為係見底反彈，亂咁去博。
小初問經紀陳，因乜原因唔留意多啲會升嘅股份，淨係知道會跌嘅股仔，根本搵唔到食。但佢就反駁，話起碼可以避免損失。
最後，經紀陳推介萬順昌(1001)，隻股自從上月公布全年業績，盈利勁升近5倍，賺成6041.2萬元之後，股價表現一直好掂。
噚日再升4.86%，收1.51元，係1年新高。隻股近排每日都有幾百萬銀成交，兼夾個棚亦搭得唔錯，成副有料到嘅格局。單睇陣勢，似有經紀行招手叫公司搞批股咁款。
慕容小初