第一次往裸體畫課室，開門驚見舊同學Joey，我的被訪者竟然會是……Joey，她也大叫起來：「你就係個記者？」Simon（香港首位裸體模特兒）即時問她：「你怕唔怕，使唔使走先？」她理直氣壯：「怕甚麼？不過別影正面，你是唯一知道我做裸體Model的朋友！」我答應她。
Joey的身材較圓潤，我不禁問：「做Model唔係要好瘦咩，點解你咁……」「肥」字還未說出，她搶着說：「乜我好肥咩？我覺得最重要係乾淨，尤其是夏天，一入冷氣房，先來個體味撲鼻，畫你嗰個都怕咗你啦！」吱吱喳喳細訴內衣痕的尷尬場面、冬天狂搽Lotion護膚、還有8嵖下冷得牙骱也打震。Joey愈說愈興奮，但這次是當裸體模特兒以來，第一次與朋友分享，難怪一說就十分鐘，未停過！
從前的她，做事只得三分鐘熱度，為何可以當了兩年模特兒？「俾人畫，有一份優越感！記得有個畫展，大堂中央當眼處的一幅裸體素描，主角就係我，幾威呀！你就當我上咗癮啦！」
中日混血兒兒島，清華大學藝術系一年級生，性格比較內斂，聲線細小。北京，是她首次接觸裸體藝術的地方；香港，隨師公帶領下，來人體藝術會畫畫。斯文的她，對於香港有女仔夠膽做Model，也驚訝不已：「相比北京，香港人還十分保守，至少那邊有全職裸體模特兒，時薪12蚊，抵用又專業！藝術家一定貪新厭舊，最憎用同一個Model，因會阻礙創作靈感，香港模特兒難求，令人非常苦惱！」
自言藝術底子未夠好的兒島，覺得畫裸體難度好大，「人的皮膚起伏及彈性係好難用筆表達出來，如果畫裸體畫得叻，就畫乜都會好，我視畫裸體為基礎。」雖然藝術家好新鮮，但兒島反覺得與Model作有限量溝通是必要的：「我不只將模特兒外形畫出來，且最好一睇我幅畫，就算你唔識佢，都睇得出Model是甚麼性格的人！」
記者：梁佩芬 攝影：周旭文